Ўзбекистондаги қўшма тиббиёт факультетларида қанча талаба таҳсил олмоқда? Соғлиқни сақлаш вазирлигининг Фан ва таълим бошқармаси бошлиғи Ўктам Исмаилов жавоб беради.
«Олий таълим етук мутахассислар тайёрлашнинг энг муҳим бўғини ҳисобланади. Сабаби ушбу босқичда талаба нафақат билим олади, балки бевосита амалиётга киришади.
Албатта, бу жараёнда халқаро ҳамкорлик ва чет эл тажрибаси жуда муҳим. Шу боис, бугун юртимизда хорижнинг етакчи тиббиёт олий ўқув юртлари билан яқин ҳамкорлик қилиш, ўқув жараёнига илғор тажрибаларни жорий этиш, хусусан, қўшма таълим дастурлари орқали малакали мутахассислар тайёрлашга алоҳида эътибор қаратиляпти.
Жумладан, айни пайтда мамлакатимиздаги мавжуд тиббиёт олий таълим муассасаларининг бакалавриат босқичида Россиянинг 15 та, Польша, Қозоғистон ва Украина олий таълим муассасалари билан 46 та қўшма таълим дастури асосида тиббиёт факультетлари ташкил этилиб, уларда жами 2 минг 266 нафар талаба таҳсил олмоқда», — дейди Исмоилов.
Қолаверса, магистратура босқичида Россия, Польша ва Беларусь олий таълим муассасалари билан 11 та қўшма таълим дастури асосида тиббиёт факультетлари очилиб, уларда бугунги кунда 65 нафар талаба соҳа билимларини ўзлаштиряпти.
Шунингдек, олий таълим муассасаларининг клиник ординатура босқичида Россия ва Беларусь институт ва университетлари билан 28 та қўшма таълим дастури асосида ташкил этилган тиббиёт факультетларида жами 84 нафар талаба билим олмоқда.
Бундан ташқари, жорий ўқув йилидан бошлаб мамлакатдаги тиббиёт олий таълим муассасаларида «Трансплантология» ва «Кардиохирургия» мутахассисликлари бўйича клиник ординатура (резидентура)да кадрлар тайёрлаш йўлга қўйилган. Мазкур йўналишлар бўйича йилига 20 нафар транплантолог ва 24 нафар кардиохирург етишиб чиқади.
Изоҳ (0)