Oliy Majlis Qonunchilik palatasi deputati Rasul Kusherbayev 6-sentabr kuni ijtimoiy tarmoqdagi sahifasi orqali videomurojaat yo‘llab, unda surxondaryolik fuqaro uni onasidan so‘kkanini bildirgandi. Deputatning ma’lum qilishicha, haqorat bo‘yicha ish sudda ko‘rib chiqildi.
Qayd etilishicha, 23-sentabr kuni jinoyat ishlari bo‘yicha Boysun tumani sudida fuqaro Sanjar Sultonovning haqorat qilganiga doir ish ko‘rib chiqilgan. Kusherbayev JIB Yunusobod tumani sudidan onlayn ishtirok etgan.
Sud Sultonovni Ma’muriy javobgarlik to‘g‘risidagi kodeksning 41-moddasiga asosan BHMning o‘ttiz baravari (9 million so‘m) miqdorida jarimaga tortish haqida qaror qabul qilgan. Yakunda deputatga fuqarolik sudi orqali huquqbuzar Sultonovdan ma’naviy zarar undirishi mumkinligi tushuntirilgan.
Haqorat javobgarlikka sabab bo‘ladi, haqoratdan tiyilaylik, — deydi deputat.O‘zi nima bo‘lgandi?
Fuqarolarga qulaylik nuqtayi nazaridan Telegram’da “Kusherbayevga murojaat” nomli kanal ochilgan. U yerda murojaatlar aktualligiga qarab e’lon qilib boriladi va mas’ul idora-tashkilotlar ularni o‘rganib, hal qilish choralarini ko‘radi.
Deputat kanal ochilishidan maqsad faqat fuqarolarga yordam berish ekanini aytib, kimnidir so‘kish yoki haqorat qilish nazarda tutilmaganini bildirgan.
Uning ma’lum qilishicha, Surxondaryo viloyati Boysun tumani deputati Zohida O‘zbekovaning turmush o‘rtog‘i bo‘lgan fuqaro Sanjar Sultonov kanaldagi murojaat yuzasidan ijtimoiy tarmoq orqali Rasul Kusherbayevni haqorat qilgan.
Sanjar Sultonov unga tegishli joyi bo‘lmasa ham, kanaldagi murojaat sabab meni deputat sifatida vafot etgan onamni haqorat qilyapti. Chidab bo‘lmaydigan darajada, to‘g‘risi. Men bunga shunchaki qarab turolmayman. Agar boshqa joyda bo‘lganida, o‘zim bilardim nima qilishni. Lekin u kishi butun tarmoqda meni so‘kib, tag‘in rahmatli onamni haqoratlayaptimi, bilishi kerakki, bu mamlakatda birovni haqoratlash shunchaki javobsiz qolib ketmaydi.Sanjar Sultonov, siz qonun oldida javob berasiz. Deputatni, fuqaroni haqorat qilganingiz uchun. Men bu ishni shunchaki tashlab qo‘ymayman. Maksimal chora ko‘rilib, javob berasiz, men sizni shu javobgarlikka tortqizaman, — degandi u Facebook’dagi sahifasiga joylagan videosida.Qonunchilik palatasi deputati shaxsan ichki ishlar vaziriga ariza yuborgan. Fuqaroning jazo olgani esa butun xalqqa ko‘rsatiladi.
Bundan tashqari, Rasul Kusherbayev kuzatuvchilariga boshqa bir fuqaroni haqorat qilmaslik kerakligini, bu uchun qonunda tegishli jazo choralari borligini eslatib o‘tgan.
Boysunlik fuqarolar bo‘lsa, o‘sha og‘zi shaloq fuqaroga yetkazib qo‘yinglar: u odam qonun oldida javob beradi. Agar qonunlarimiz ishlasa, albatta, u kishi jazoga tortiladi, — deya so‘zlarini tugatgan deputat.
Izoh (0)