Украинада жанговар ҳаракатлар олиб бориш учун қамоқхоналардан жалб қилинган россиялик ёлланма аскарлар қаторига каннибал қотил ҳам қўшилди, деб ёзади Британиянинг The Sun нашри.
23 ёшли Егор Комаров Санкт-Петербургда машинасидан боши танасидан жудо қилинган жасад топилганидан сўнг ҳибсга олинган, кейинроқ эса мазасини татиш учун уни еб кўрганини тан олган эди. Энди эса у ёлланма жангчилардан иборат Вагнер гуруҳига келиб қўшилган. Ундан аввалроқ эса ушбу гуруҳнинг етакчиси деб тахмин қилинадиган Евгений Пригожин қамоқхонада маҳбуслар орасида ташвиқот олиб бориб, уларни урушда қатнашишга даъват этаётгани акс этган видео тарқалганди.
«Маҳбусларга, шу жумладан, қотиллар ва жинсий зўравонлик бўйича жиноятчиларга Украинадаги урушда олдинги фронтда олти ой туриб бериш эвазига озодлик ва Путин томонидан афв этилиш таклиф қилинган», — дейилади хабарда.
«Россия панжара ортида» ташкилоти вакили Ольга Романованинг сўзларига кўра, уларнинг сафида «каннибаллик тажрибасига эга бўлган» камида бир нафар «қотил» бор. Путинга қарши ASLAN Twitter-саҳифаси қайд этишича, бу одам Комаровдир.
Вагнер гуруҳи ўзи қандай гуруҳ?
Вагнер гуруҳи биринчи марта Украинада 2014 йилда пайдо бўлган ва Россиянинг Қримни эгаллаб олишида муҳим роль ўйнаган эди.Унга махсус топшириқли бўлинма собиқ жангчиси Дмитрий Валеревич Уткин асос солган деб ҳисобланади, у гуруҳга Гитлернинг севимли композитори Ричард Вагнернинг номини берган.
Кўплаб Ғарб ОАВлари Вагнер гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.
Изоҳ (0)