Қодиров Чеченистонда ҳарбий хизматга чақирув режаси 254 фоизга ортиғи билан бажарилганини маълум қилди
Чеченистон раҳбари Рамзан Қодиров Россияда эълон қилинган қисман сафарбарлик доирасида республика аҳолисини ҳарбий хизматга чақиришга бағишланган йиғилиш ўтказди. Қодировнинг сўзларига кўра, Чеченистонда ҳарбий хизматга чақириш режаси «254 фоизга ортиғи билан бажарилган» ва шу вақтга қадар республиканинг 20 минг аҳолиси Украинадаги ҳарбий амалиётда қатнашган.
Унинг таъкидлашича, бу кўрсаткичга ҳали сафарбарлик эълон қилинмасидан аввал Мудофаа вазирлигининг янги бўлинмалари ташкил этилгани туфайли эришилган.
Республикада зарурат туғилганда Ватан ҳимоячилари сафига қўшила оладиган минглаб кўнгиллилар захираси мавжуд. Шунинг учун мен Чеченистон республикаси аҳолисини, хусусан, севимли ва ҳурматли оналаримизни хотиржам бўлишга чақираман, — деб ёзди у Telegram’да.Рамзан Қодировнинг фикрича, «ҳар бир инсон аниқ фуқаролик позициясига эга бўлиши ва гўл бўлмаслиги керак».
«Ватанпарварман деб қичқириб, кўксини уриб, Россияни сафарбарлик даврига ташлаб кетганларга келсак, бундай қўрқоқлар учун қайтиш йўли абадий беркилиши зарур», — деди у.
Владимир Путин 21 сентябрдан бошлаб Россияда қисман сафарбарлик эълон қилди. Россия Мудофаа вазирлиги 300 минг захирадаги аскар чақирилишини айтди. «Новая Газета. Европа» нашри 1 миллион киши ҳарбий хизматга чақирилиши ҳақида хабар берди, бироқ Кремль бу маълумотни «ёлғон» деб атади.
