Туркманистонда Мустақиллик байрами (27 сентябрь) олдидан Халқ Маслаҳати миллий кенгаши раиси Гурбангули Бердимуҳамедовнинг электр энергиясини ишлаб чиқариш ва экспорт қилишга бағишланган «Туркманистон электроэнергия қуввати» номли янги китоби нашр этилди. Бу ҳақда «Туркменистан сегодня» хабар берди.
Китобда собиқ президентнинг 3 сентябрь куни Давлат энергетика институти талабалари ва ўқитувчилари билан бўлиб ўтган учрашувидаги нутқи ўрин олган.
Шунингдек, «Туркманистон президенти Сердар Бердимуҳамедов қудратли давлатнинг янги даврида энергетика саноатини ривожлантиришни мамлакат иқтисодий стратегиясининг муҳим йўналишларидан бири сифатида белгилаб бергани» ҳақида ҳам сўз юритилган.
Бундан ташқари, китобда Гурбангули Бердимуҳамедов муқобил энергия манбаларидан фойдаланиш ва «яшил» иқтисодиётни ривожлантириш масалаларига тўхталиб ўтади. Унинг қайд этишича, 2019—2025 йилларда Олтин кўл яқинида қуввати 10 мегаватт бўлган қуёш-шамол электр станциясини қуриш режалаштирилган.
Нашрнинг таъкидлашича, китоб юқори стандартларда чоп этилган.
Ўз навбатида, «Хроника Туркменистана» газетаси Туркманистонда ҳатто йирик шаҳарларда ҳам мунтазам равишда электр энергияси узилиб туришини қайд этди. Эскирган инфратузилма иссиқ ёз ойларида босимга бардош бера олмайди. Шунингдек, турли об-ҳаво ҳодисалари ҳам электр таъминотидаги узилишларга олиб келиши мумкин.
Бу собиқ президентнинг 58-китобидир. 9 апрель куни Туркманистон Вазирлар Маҳкамаси йиғилишида унинг «Ҳаётим мазмуни» номли 57-китоб тақдим этилганди.
Изоҳ (0)