Россияда қисман сафарбарлик эълон қилинганидан кейин бир кеча-кундуз ичида қарийб 10 минг киши чақириқ қоғозини кутмасдан ўзлари ҳарбий комиссариатларга келган. Бу ҳақда Россия Қуролли кучлари Бош штаби Бош ташкилий-сафарбарлик бошқармаси вакили контр-адмирал Владимир Цимлянский маълум қилди, деб ёзади «РБК».
«Қисман ҳарбий сафарбарлик ўтказилган биринчи куни ҳарбий комиссариатларга 10 мингга яқин фуқаро чақириқ қоғози келишини кутмасдан, мустақил равишда келди», — деди Цимлянский.
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.
Шундан кейин Россияда сафарбарлик эълон қилинишига қарши «Change.org» сайтига жойланган петицияни ўн минглаб одам имзолади.
Сафарбарлик эълон қилинганидан кейин бир неча дақиқалар ичида Москвадан Истанбулга, Тбилисига ва Ереванга тўғридан-тўғри рейслар учун чипталар тўлиқ сотилиб кетган. Шунингдек, Москвадан Тошкентга рейслар чипталари ҳам қолмаган. Россиянинг Қозоғистон ва Грузия билан чегараларида бир неча километрлик навбатлар юзага келди.
Армияда хизмат ўтаган, жанговар тажрибага ёки зарур ҳарбий мутахассисликка эга бўлганлар чақирилмоқда. Уларга шартнома асосидаги ҳарбий хизматчилар мақоми берилади, сўнг сафарбар этилганлар тегишли тўловларни ола бошлади, деди мудофаа вазири.
Идора кейинроқ аниқлик киритишича, 35 ёшгача бўлган оддий аскар ва сержантлар, 50 ёшгача бўлган кичик ва 55 ёшгача бўлган катта офицерлар сафарбарлик бўйича чақирилади. Биринчи навбатда ўқчилар, танкчилар, артиллериячилар, ҳайдовчилар чақирилади. Ҳарбий ҳисобда турган ва «қисқа муддатли сафар билан» чет элда бўлганлар ҳам сафарбар этилиши мумкин. Хорижда доимий яшайдиган ва ҳарбий ҳисобда турмайдиганлар сафарбарлик таъсирига тушмайди.
Тегишли ҳарбий-ҳисоб мутахассисликлари бўлган аёллар, хусусан, тиббий ходимлар ҳам хизматга чақирилиши мумкин. Саломатлиги туфайли хизматга вақтинчалик яроқсиз деб топилганлар ҳамда қарамоғида 16 ёшга тўлмаган тўрт ва ундан ортиқ болалари бўлганлар ҳам сафарбар этилмайди.
Изоҳ (0)