Арманистон Мудофаа вазирлиги Озарбайжонни ўт очишни тўхтатиш режимини бузишда айблади.
«23 сентябрь куни тахминан 7:40 да Озарбайжон Қуролли кучлари бўлинмалари яна ўт очишни тўхтатиш режимини бузиб, Арманистон-Озарбайжон чегарасининг шарқий йўналиши бўйлаб жойлашган арман жанговар позицияларига турли калибрли ўқотар қуролдан ўт очди. Жавоб ҳаракатлари билан душманнинг олови ўчирилди. Арманистон томонида талафотлар йўқ», — дейилади вазирлик сайтида.
Ўз навбатида Озарбайжон Мудофаа вазирлиги Ереванни чегарага туташ учта тумандаги позицияларни ўққа тутишда айблади.
Бундан аввал 21 сентябрь куни ҳам Ереван Озарбайжон ҳарбийлар ўт очгани ҳақида хабар берганди.
Зиддиятнинг кескинлашуви қачон бошланди?
Ереван ва Баку ўртасида навбатдаги кескинлик 12 сентябрдан 13 сентябрга ўтар кечаси бошланди. Арманистон Озарбайжонни жануби-шарқий чегарани ўққа тутишда айблади. Ўз навбатида, Боку ҳам Арманистон томондан Озарбайжон армиясининг таъминот йўллари миналангани, шунингдек, ўт очилганини даъво қилди.13 сентябрь тонгида томонлар Москва воситачилигида ўт очишни тўхтатишга келишди, аммо отишмалар тўхтамади ва икки мамлакат ҳам бунда қарши тарафни айблади. 14 сентябрь оқшомида томонлар тинчлик бўйича яна бир бор келишувга эришди.
Арманистон КХШТдан ёрдам сўради, бироқ улар тинчликпарвар кучларни юборишдан бош тортди. КХШТ Арманистонга ўз миссиясини жўнатди, 19 сентябрь куни гуруҳ низони тинчлантириш учун таклифлар ишлаб чиққанини маълум қилди.
Изоҳ (0)