Қозоғистон Сенати Биринчи президент кунини давлат байрамлари рўйхатидан чиқариб ташлади
Қозоғистон Сенати (парламент юқори палатаси) депутатлари Биринчи президент кунини давлат байрамлари тоифасидан чиқариб ташлаш тўғрисидаги қонунни қабул қилди. Бу ҳақда «Kazinform» дея хабар бермоқда.
«Қозоғистон республикасининг айрим қонун ҳужжатларига кинематография, маданият ва байрамлар масалалари бўйича ўзгартиш ва қўшимчалар киритиш тўғрисида»ги қонунга тегишли ўзгартиришлар киритилган. Бу ҳақдаги қарор Сенат ялпи мажлисида қабул қилинган.
7 сентябрь куни парламент қуйи палатаси депутатлари ушбу байрамни давлат байрамлари рўйхатидан чиқариш таклифини билдирган эди.
Қозоғистонда Биринчи президент куни 1 декабрда нишонланди ва у дам олиш куни ҳисобланарди. Байрам давлатнинг биринчи раҳбари Нурсултон Назарбоев шарафига ташкил этилган: 1991 йил 1 декабрда у республика президенти этиб сайланган. Ушбу байрамга давлат байрами мақоми бериш тўғрисидаги қонун 2011 йил 14 декабрда имзоланган эди.
