Ижтимоий тармоқларда Андижон шаҳрининг собиқ прокурори Қ.А.га оид жиноят иши бўйича судьяга жуда кўп миқдорда пора беришга уринган С.А. қўлга олингани ҳақида хабар тарқалди. Судьялар олий кенгаши матбуот хизматининг маълум қилишича, бу хабарлар ҳақиқатга тўғри келмайди.
Аниқланишича, хабарда қайд этилган С.А. қарийб бир ой муқаддам бошқа ҳудуд ва умуман бошқа ҳолатда фирибгарлик жинояти устида қўлга олинган бўлиб, айни пайтда тергов ҳаракатлари олиб борилмоқда.
Ушбу ҳолатнинг шу кунларда Фарғона вилояти судида мазмунан кўриб чиқилаётган Андижон шаҳрининг собиқ мансабдор шахслари ва бошқаларга оид жиноят иши бўйича судланувчилар ҳамда (иш бўйича раислик этувчи) судьяга бирон-бир боғлиқлиги йўқ.
Маълумот учун, Фарғонада Андижон шаҳри собиқ ҳокими ва яна 43 кишига оид иш кўриб чиқилмоқда. Улар орасида собиқ прокурор Қ.А. (эркак, 1982 йилда Андижон вилоятида туғилган, муқаддам судланмаган, Андижон шаҳри прокурори ва Андижон вилояти прокурорининг жамоатчилик билан алоқалар ва ҳуқуқий ахборот бўйича катта ёрдамчиси лавозимларида ишлаган) ҳам бор.
Аввалроқ собиқ ҳоким Баҳром Ҳайдаровнинг давлат манфаатларига 1,7 миллиард сўм зарар келтирганликда айбланаётгани, унинг депутатлик дахлсизлигини бекор қилиш учун вилоят прокуратурасига тақдимнома киритилгани хабар қилинган эди. «Дарё» мухбири билан суҳбатлашган ҳоким эса буни инкор этганди.
Изоҳ (0)