Айни вақтда президент Шавкат Мирзиёев Нурафшон шаҳрида Халқ депутатлари Тошкент вилояти кенгашининг сессиясида иштирок этмоқда. Бу ҳақда «Дарё» мухбири хабар берди.
Президент ўз сўзида пахта етиштириш ва ҳосилни йиғиб олишдаги муаммолар ҳал этилаётганини айтиб ўтди.
«Пахта мавсумида теримчиларга бериш учун пул берилмасди, бир вақтлар. Мен Жиззахда ҳоким бўлган вақтим Бахмал ва Зомин туманларига бориб, асал олиб келиб, пахта пулининг ўрнига теримчиларга тарқатганман. Бу қийинчиликлар менинг эсимдан чиқиши мумкинми? Асло йўқ!», — дейди давлат раҳбари.
Шавкат Мирзиёев ҳозирги кунда пахтанинг килосига 1,5—2 минг сўмдан бериб тердирилаётганини таъкидлади.
«Менга банкдаги пул керак эмас, аксинча, халқнинг чўнтагига кирсин. Пахтани ким етиштиради? Ким ҳосилни йиғиб олади? Манфаат берилса, шу одамларимиз ҳаммасини чиройли қилиб бажаришади», — дейди президент.
Шавкат Мирзиёев авваллари бу вақтларда тўлиқ пахта билан машғул бўлинганини айтди.
«Ҳозир эса барча ҳокимлар вақтининг 10-15 фоизини пахтага сарфлаяпти. Албатта, буни билган билади. Ҳокимлар, уларнинг ўринбосарлари, прокурорлар, ички ишлар ходимларигача хизмат жойида уйлар қилиб беряпмиз. Мақсад — улар бировнинг қўлига қарамасдан, халқимизни рози қилиб ишлашсин», – дейди давлат раҳбари.
Изоҳ (0)