Осиё тараққиёт банки (ОТБ) 2022—2023 йилларда ривожланаётган Осиё мамлакатлари учун иқтисодий ўсиш прогнозини пасайтирди. Бунга сабаб қилиб ортиб бораётган глобал хавфлар кўрсатилган. Бу ҳақда «Интерфакс» хабар бермоқда.
Эндиликда ЯИМ 2022 йил апрель ойида кутилаётган 5,2 фоизга нисбатан 4,3 фоизга, 2023 йилда эса аввалги 5,3 фоизга нисбатан 4,9 фоизга тушиши кутилмоқда.
ОТБ ривожланаётган Осиё ва Тинч океани минтақасидаги давлатларнинг иқтисодий ўсиш прогнозини яна бир бор пасайтирди.
Бунга эса марказий банклар томонидан пул-кредит сиёсатининг кескинлашуви, Украинадаги узоқ давом этган урушнинг оқибатлари ва Хитойдаги такрорий COVID-19 локдаунлари сабаб бўлган.
Маҳаллий истеъмол харажатлари ва инвестициялар ўсишни рағбатлантирмоқда, чунки минтақа мамлакатлари COVID-19 пандемияси туфайли киритилган чекловларни енгиллаштирди.
Бироқ Украинада давом этаётган уруш глобал ноаниқликни кучайтирди, таъминотда узилишларни келтириб чиқарди, энергия ва озиқ-овқат бозорларида беқарорликка сабаб бўлди.
ОТБ таҳлилчиларининг фикрича, Федерал захира тизими ва Европа Марказий банки томонидан пул-кредит сиёсати янада кескинлашаётгани глобал талабни пасайтириб, молиявий бозорларга салбий таъсир ўтказмоқда.
Шунингдек, вақти-вақти билан COVID-19 тарқалиши ва янги чекловлар минтақадаги энг йирик иқтисодиёт бўлган Хитойда ўсишни секинлаштирди.
Хитойнинг бу йилги ялпи ички маҳсулотнинг ўсиши апрель ойидаги 5 фоизлик прогноздан 3,3 фоизга туширилди. Ўттиз йилдан ортиқ вақт ичида биринчи марта ривожланаётган Осиё давлатлари Хитой иқтисодиётига қараганда тезроқ ўсади.
ОТБ жорий йилда ривожланаётган Осиёдаги инфляцияни олдин тахмин қилинган 3,7 фоиздан 4,5 фоизга оширди. Келгуси йил учун прогноз 3,1 фоиздан 4 фоизгача кўтарилди.
Минтақадаги инфляция дунёнинг бошқа қисмларига қараганда пастлигича қолаётган бўлса-да, таъминотдаги узилишлар озиқ-овқат ва ёқилғи нархини оширишда давом этмоқда.
Изоҳ (0)