Саудия Арабистони Хитойга нефть етказиб бериш бўйича Россияни ортда қолдирди

Август ойида Россия Хитойга нефть экспорти бўйича иккинчи ўринга тушиб кетди. Бу ҳақда мамлакат божхона маълумотларига таяниб, Reuters хабар бермоқда.

Саудия Арабистони тўрт ой ичида биринчи марта етказиб бериш бўйича яна етакчи бўлди ва Хитойга экспорт ҳажмини 8,48 миллион тоннагача оширди.

Йиллик ҳисобда Россиядан нефть етказиб бериш 28 фоизга, Саудия Арабистонидан эса 5 фоизга ошди. Хитойга нефть етказиб бериш бўйича учинчи ўринни Ироқ эгаллади — 4,32 миллион тонна. Бу ўтган йилга нисбатан 26 фоизга кам.

Тўртинчи ўринда Ангола (2,2 миллион тонна, 33,8 фоизга пасайиш), бешинчи ўринда Бразилия (1,88 миллион тонна, 46,9 фоизга пасайиш) жойлашган.

Бундан ташқари, Малайзиядан импорт 2021 йилга нисбатан қарийб икки баравар кўпайди — 92,7 фоизга ўсиб, 3,37 миллион тоннани ташкил этди.

Малайзия сўнгги икки йил ичида Эрон ва Венесуэла томонидан, сўнгги пайтларда эса Россия томонидан нефть учун тез-тез юк ташиш пункти сифатида фойдаланилган.

2022 йилнинг саккиз ойида Россиянинг Хитойга экспорти 50 фоизга (72,9 миллиард долларгача) ўсди, бу асосан Россиянинг хом ашё ва энергия етказиб бериш ҳажмини ошириши ҳисобига бўлди.

Аввалроқ Россия Европа ўрнига Хитой ва Ҳиндистонга катта миқдорда нефть сотаётгани ҳақида хабар берилганди.