Rossiyaliklarning Gruziyaga kirishi ommaviy taqiqlana boshladi

Rossiyaliklarning Gruziya hududiga kirishi ommaviy ravishda taqiqlana boshladi. Bu haqda “Agentstvo” nashri yozmoqda.

Janubiy Kavkazdagi Free Russia Foundation fondi direktori Yegor Kuroptev nashrga ma’lum qilishicha, Gruziya bir necha hafta oldin rossiyaliklar uchun chegara nazoratini kuchaytirgan; endi har kuni bir necha o‘nlab odamlarga mamlakatga kirish taqiqlanmoqda.

“Na kasbi, na Gruziyada yashashi yoki uy-joy ijarasi shartnomasining borligi e’tiborga olinmayapti. Agar u yerda yashash uchun ruxsatnomasi bo‘lmasa, boshqa hujjatlar Rossiya fuqarolari uchun Gruziyaga kirish kafolati bo‘la olmayapti”, — dedi Kuroptev.

Rossiyaning Trabzondagi bosh konsulxonasi ham rossiyaliklarning Turkiya orqali Gruziyaga kirishi “deyarli har kuni” rad etilayotgani haqida ma’lum qildi.

Urush boshlanganidan keyin Gruziya rossiyalik muhojirlar eng ko‘p boradigan mamlakatlardan biriga aylandi. U yerga ko‘p sonli siyosiy faollar va jurnalistlar ko‘chib o‘tdi.

Avvalroq Latviya, Litva va Estoniya Shengen vizasiga ega Rossiya va Belarus fuqarolari uchun quruqlik chegaralarini kesib o‘tishni sezilarli darajada cheklashga kelishib olgan edi. Rasmiy taqiq tez orada e’lon qilinadi.