Путин чегарадаги вазият юзасидан Тожикистон ва Қирғизистон президентлари билан музокаралар ўтказди

Россия президенти Владимир Путин 18 сентябрь куни Қирғизистон ва Тожикистон раҳбарлари Садир Жапаров ва Эмомали Раҳмон билан телефон орқали суҳбатлашди, деб ёзади Asia Plus Кремль баёнотига таяниб.

«Владимир Путин томонларни вазиятнинг янада кескинлашишига йўл қўймасликка ва уни фақат тинч, сиёсий-дипломатик воситалар билан тезроқ тартибга солишга чақирди, Россия қирғиз-тожик чегарасида барқарорликни таъминлаш мақсадида зарур ёрдамни кўрсатишга тайёрлигини тасдиқлади», — дейилади Россия етакчиси матбуот хизмати хабарида.

Тожикистон президенти матбуот хизмати маълум қилишича, суҳбат чоғида Эмомали Раҳмон ва Владимир Путин икки томонлама алоқаларга оид долзарб масалаларни муҳокама қилган.

«Томонларнинг диққат марказида Тожикистон ва Қирғизистоннинг чегарадош ҳудудларида юзага келган ҳолат фонида Марказий Осиёда вазиятнинг ривожланиши масалалари бўлди», — дейилади хабарда.

Шунингдек, Путин Қирғизистон президенти Садир Жапаров билан телефон орқали суҳбатлашган.

Аввалроқ АҚШ Давлат департаменти Душанбе ва Бишкекни чегарада ўт очишни тўхтатиш режимига амал қилишга чақирганди.

«Биз тожик-қирғиз чегарасидаги тўқнашувлар ҳақида келиб тушаётган хабарлардан хавотирдамиз. Тинч аҳолининг ҳаёти хавф остида, ва биз жабрланганларга ҳамдардлигимизни изҳор этамиз. Иккала томонни ҳам ўт очишни тўхтатиш режимига риоя қилишга ва тинчликни дипломатик йўл билан қайта тиклаш бўйича саъй-ҳаракатларни икки баравар оширишга чақирамиз», — деб ёзди Давлат департаменти матнуот котиби Нед Прайс ўз Twitter’ида.

Қирғизистон ва Тожикистон чегарасидаги кенг кўламли жанговар тўқнашувлар 16 сентябрь куни эрталаб бошланди. Томонлар бир-бирини ўт очишда айблади. Икки мамлакат ҳарбийлари ўртасидаги кучли жанглар бутун чегара бўйлаб кун бўйи давом этди. Ярим тунга келибгина, ўт очишни тўхтатишга муваффақ бўлишди.

17 сентябрь куни тонгда тўқнашувлар қайта бошланди. Томонлар бир-бирини ўт очишни тўхтатиш ҳақидаги битимни бузганликда айблади. Кечга келиб, отишмалар тўхтади.

Тожикистон Ташқи ишлар вазирлиги 18 сентябрь кунги хабарида тожик-қирғиз чегарасидаги низода 28 киши ҳалок бўлганини маълум қилди.

Қирғизистон эса 46 киши чегардаги зиддиятлар қурбонига айланганини хабар қилди.