Самарқанд шаҳрида Жамшид Хўжаев ва Шанхай ҳамкорлик ташкилоти саммити доирасида Эрон нефть вазири Жавад Авжийнинг музокаралари бўлиб ўтди. Бу ҳақда Инвестициялар ва ташқи савдо вазирлигига таяниб «Дунё» ахборот агентлиги хабар қилди.
Қайд этилишича, учрашув давомида тажриба алмашиш ва кадрлар салоҳиятини юксалтириш, нефть-газ ва нефть-кимё тармоқлари эҳтиёжлари учун қўшма корхоналарда ускуналар ишлаб чиқариш ва етказиб беришни ташкил этиш каби йўналишларда узоқ муддатли ва ўзаро манфаатли ҳамкорликни йўлга қуйиш истиқболлари муҳокама қилинган.
Хусусан, томонлар Ўзбекистондаги нефтни қайта ишлаш заводларини модернизация қилиш, нефть-кимё саноати эҳтиёжлари учун энг юқори халқаро стандартларга жавоб берадиган катализаторлар ишлаб чиқариш ва мақбул нархларда бурғулаш қурилмаларини етказиб беришни ташкил этиш бўйича лойиҳаларни биргаликда амалга ошириш имкониятларини кўриб чиққан. Эрон томони лойиҳаларни ҳаётга татбиқ этишда тўғридан-тўғри инвестицияларни жалб қилиш чораларини кўришга тайёрлигини билдирган.
Нефть ва газ саноати ходимларининг тажрибаси ва малакасини оширишни назарда тутган ҳолда илмий соҳада ҳамкорликни йўлга қўйиш истиқболлари муҳокама қилинган. Эроннинг етакчи илмий-тадқиқот марказлари билан GTL технологиясидан фойдаланган ҳолда газ конденсати ва суюлтирилган газ ишлаб чиқариш каби устувор йўналишларда фаолият юритувчи корхоналар ходимларини тайёрлаш дастурини биргаликда ишлаб чиқиш бўйича келишувга эришилган.
Музокаралар якунида томонлар шериклик муносабатларини давом эттириш ҳамда муҳокама қилинган лойиҳа ва ташаббусларни амалга ошириш учун «Йўл харитаси»ни биргаликда ишлаб чиқишга келишиб олган.
Изоҳ (0)