Шавкат Мирзиёев раислигида ўтказилган видеоселектор йиғилишида ҳамма вилоят, шаҳар ва туманларда сайёҳлар борадиган жойларни кўпайтириш кераклиги қайд этилди. Бу ҳақда президент матбуот котиби хабар қилди.
«Ҳар бир ҳоким ўзига шундай саволни берсин: ‘менинг вилоятим, шаҳар ва туманимга сайёҳлар қаерга ва нимани кўришга келади?’. Қайси ҳоким шу саволга тўғри жавоб топиб, туризм дастурларини қилса, албатта, ўзгариш бўлади», — деди президент.
Ҳар бир вилоят ҳокимига ички ва четдан турист жалб қилиш бўйича ўзининг «туристик ҳалқаси»ни ташкил этиш бўйича лойиҳасини ишлаб чиқиш топширилган. Энг яхши лойиҳаларга танлов асосида 20 миллион долларгача кредит ажратилади.
Марказий банкка 1 триллион сўмлик кредит ресурсларини ажратиш, йил якунига қадар яна қўшимча 100 миллион доллар хорижий кредит линиялари жалб қилиш топшириғи берилган бўлса-да, бу маблағлар ҳали тадбиркорларга етиб бормагани танқид қилинган.
Агар 1 триллион сўм маблағлар тижорат банкларига жойлаштирилмаса, Марказий банк раҳбариятига нисбатан қатъий чоралар кўрилиши таъкидланган.
1 ноябргача туризм хизматлари учун 100 миллион долларлик кредит линиясини очиш, йил якунига қадар келгуси йил учун яна қўшимча 100 миллион доллар жалб қилиш топширилган. Шунингдек, мутасаддиларга:
- барча сув омборлари, ўрмон хўжалиги ерларини ўрганиб, уларда туристик зоналар ташкил этиш бўйича дастур ишлаб чиқиш;
- божхона-чегара пунктларидан тезкор ўтказиш хизматини йўлга қўйиш, туристик ахборот марказларини ишга тушириш бўйича таклиф киритиш;
- Қорақалпоғистон, Бухоро, Қашқадарё, Навоий, Сурхондарё, Фарғона ва Хоразмнинг чўл ҳудудларида «сафари» туризмини ривожлантириш мақсадида йўл танламас транспортлар учун импорт тўловларини тушириш таклифини киритиш топширилган.
Изоҳ (0)