Ижтимоий тармоқларда Марғилон шаҳридаги 16 ва 24-сон мактабгача таълим ташкилотларида болалар овқатдан заҳарлангани ҳақида хабарлар тарқалганди. Мактабгача таълим вазирлиги ушбу ҳолат назоратга олганини маълум қилди.
Аниқланишича, 14 сентябрь куни кеч соат 20:30 лардан бошлаб 15 сентябрь куни давомида 16 ва 24-сонли давлат мактабгача таълим ташкилотларида тарбияланаётган 3-5 ёшдаги жами 12 нафар бола, 16-сонли давлат мактабгача таълим ташкилотидан 8 нафар бола ота-оналар шикоятига кўра шифокорлар томонидан тиббий кўрикдан ўтказилиб, дастлабки «алиментар диарея» бирламчи ташхиси билан Марғилон шаҳар Юқумли касалликлар шифохонасига ётқизилган.
Ҳозирги кунда шифохонада бемор болалар қолмаган, уларнинг барчаси қониқарли ҳолатда уйларига жавоб берилиб юборилган. Шунингдек, ҳолатга аниқлик киритиш мақсадида Марғилон шаҳар Санитария эпидемиология осойишталик ва жамоат саломатлик маркази томонидан бактериологик таҳлил учун намуналар олинган.
«Мактабгача таълим вазирлиги ушбу ҳолатни назоратга олганлигини ҳамда ҳолат юзасидан қўшимча маълумотлар берилишини маълум қилади», — дейилади хабарда.
Мазкур ҳолат юзасидан ҳозирда шаҳар прокуратураси томонидан терговга қадар текширув ўтказилмоқда, экспертиза текшируви учун тегишли намуналар олиниб, суд-тиббий экспертизалари тайинланган.
Мавзуга доир:
Изоҳ (0)