Maktabgacha ta’lim vazirligi Marg‘ilonda kasalxonaga yotqizilgan bog‘cha bolalari haqida ma’lumot berdi

Ijtimoiy tarmoqlarda Marg‘ilon shahridagi 16 va 24-son maktabgacha ta’lim tashkilotlarida bolalar ovqatdan zaharlangani haqida xabarlar tarqalgandi. Maktabgacha ta’lim vazirligi ushbu holat nazoratga olganini ma’lum qildi.

Aniqlanishicha, 14-sentabr kuni kech soat 20:30 lardan boshlab 15-sentabr kuni davomida 16 va 24-sonli davlat maktabgacha ta’lim tashkilotlarida tarbiyalanayotgan 3-5 yoshdagi jami 12 nafar bola, 16-sonli davlat maktabgacha ta’lim tashkilotidan 8 nafar bola ota-onalar shikoyatiga ko‘ra shifokorlar tomonidan tibbiy ko‘rikdan o‘tkazilib, dastlabki “alimentar diareya” birlamchi tashxisi bilan Marg‘ilon shahar Yuqumli kasalliklar shifoxonasiga yotqizilgan.

Hozirgi kunda shifoxonada bemor bolalar qolmagan, ularning barchasi qoniqarli holatda uylariga javob berilib yuborilgan. Shuningdek, holatga aniqlik kiritish maqsadida Marg‘ilon shahar Sanitariya epidemiologiya osoyishtalik va jamoat salomatlik markazi tomonidan bakteriologik tahlil uchun namunalar olingan.

“Maktabgacha ta’lim vazirligi ushbu holatni nazoratga olganligini hamda holat yuzasidan qo‘shimcha ma’lumotlar berilishini ma’lum qiladi”, — deyiladi xabarda.

Mazkur holat yuzasidan hozirda shahar prokuraturasi tomonidan tergovga qadar tekshiruv o‘tkazilmoqda, ekspertiza tekshiruvi uchun tegishli namunalar olinib, sud-tibbiy ekspertizalari tayinlangan.

Mavzuga doir:

• Farg‘onadagi bog‘chada bolalar ovqatdan zaharlangani rad etildi
• Navoiydagi bog‘chada bolalar ommaviy zaharlangani aytilmoqda