Ўт очишни тўхтатиш ҳақида келишувга эришилганидан кейин бир ярим соат ўтиб, Қирғизистон Тожикистон аҳоли пунктларини барча турдаги оғир қурол-яроғлар билан ўққа тутишни қайта бошлади, деб ёзади Asia Plus Тожикистон Миллий хавфсизлик давлат қўмитаси (МХДҚ)га таяниб.
Гафуров туманининг Овчи-Қалъача Бобожон жамоати, Исфара шаҳридаги Ворух ва Чоркух жамоатлари ўқ ёмғири остида қолган.
«Қирғизистон ҳарбий вертолётлар ва зарбдор дронлар билан Тожикистоннинг турар жой биноларига ва фуқаролик объектларига ҳаводан ҳужум бераётгани хавотир уйғотади», — дейилади МХДҚ хабарида.
Шунингдек, хабарга кўра, Қирғизистон томони Боткен тумани марказидан Тожикистон билан чегарадош ҳудудларга қўшимча куч ва воситаларни жалб қилмоқда.
Қирғизистоннинг учувчисиз учар қурилмалари томонидан берилган зарбалар оқибатида ўнлаб уйлар вайрон бўлиб, кўплаб тинч аҳоли вакиллари жабрлангани айтилмоқда.
Қирғизистон томони, ўз навбатида, чегарадаги жанговар ҳаракатлар чоғида 24 киши ҳалок бўлганини маълум қилди. Яна 87 киши турли жароҳатлар олган. Шунингдек, 16 сентябрь кечқурунги ҳолатга кўра, Қирғизистоннинг Тожикистон билан чегарадош бўлган Боткен вилоятидан 136 минг аҳоли хавфсиз жойларга эвакуация қилинган.
Тожикистон ва Қирғизистон ўртасидаги чегара узунлиги 970 километрга етади. Бироқ мамлакатлар СССР тарқалиб кетганидан кейин ҳалигача уни демаркация қилиш бўйича жараёнларни якунлагани йўқ — уларда 970 километр чегаранинг 460 километри бўйича келишувлар йўқ. Шу сабабли улар вақти-вақти билан қайсидир ҳудуд бўйича ўз норозиликларини ифодалаб туради, маҳаллий аҳоли зиддиятларга киришади.
Қирғизистон ва Тожикистон ўртасидаги чегарада вазият 14 сентябрь куни эрталаб кескинлашди. Қирғизистон томони Тожикистон чегарачилари мамлакатнинг Боткен туманига бостириб кирганини, тожик томони эса Исфара туманида чегарачилар ўққа тутилганини маълум қилди.
Чегарада шиддатли жанглар 16 сентябрга ўтар кечаси юз берди. Шу куни эрталаб Тожикистон ва Қирғизистон президентлари Эмомали Раҳмон ва Садир Жапаров ўт очишни тўхтатиш ҳақида келишиб олди, бироқ сал кейинроқ томонлар бир-бирини бтитимни бузишда айблади.
Изоҳ (0)