Луганск халқ республикаси (ЛХР) расмийлари Луганскдаги Бош прокуратура биносида портлаш содир бўлгани ҳақида хабар берди. Портлашда ЛХР бош прокурори Сергей Горенко ва унинг ўринбосари Екатерина Стегленко ҳалок бўлди. Уларнинг ўлимини ЛХР раҳбари Леонид Пасечник тасдиқлади. Россия Тергов қўмитаси раҳбари Александр Бастрикин бош прокурор ва ЛХР прокурори ўринбосарининг ўлими юзасидан жиноий иш қўзғатишни буюрди.
«Бугун террорчилик акти оқибатида ЛХР бош прокурори Сергей Горенко ва унинг ўринбосари Екатерина Стегленко ҳалок бўлди. Луганск халқ республикаси Бош прокуратураси биносида юз берган портлаш Киев режими рухсат этилган чегараларни кесиб ўтганидан далолат беради», — деб ёзди Леонид Пасечник ўзининг Telegram-каналида. У ЛХР аҳолисини «ваҳимага тушмаслик»ка чақирди ва «республикадаги вазият назорат остида» эканини таъкидлади.
«Бош прокуратура биносидаги портлаш эпицентри бош прокурор идораси яқинида бўлган», — дейди манба Луганскдаги портлаш тафсилотлари ҳақида «Интерфакс»га. Республика халқ милициясининг хабар беришича, муассаса биносида қўлбола портловчи қурилма портлаган.
Сергей Горенко — Луганск вилояти, Свердловск шаҳрида туғилган, у 40 ёшда эди. Горенко 2017 йилдан бери ЛХР бош прокурори лавозимида ишлаб келган.
Екатерина Стегленко ҳам Свердловск шаҳрида туғилган, у 44 ёшда эди. У 2017 йилдан буён ЛХР бош прокурори ўринбосари лавозимида ишлаб келган.
Изоҳ (0)