Қозоғистон парламенти палаталарнинг қўшма йиғилишида мамлакат конституциясига ўзгартиришлар киритиш тўғрисидаги қонунни икки ўқишда қабул қилди. Ҳужжатни йиғилишда қатнашган барча 50 нафар сенатор ва 99 нафар депутат бир овоздан қўллаб-қувватлаган. Парламентда қабул қилинган қонун имзолаш учун Қозоғистон президентига юборилади.
Қабул қилинган тузатишлар қуйидагиларни назарда тутади:
- Қозоғистонда президентлик муддати беш йилдан етти йилгача узайтирилади, президент эса иккинчи муддатга қайта сайлана олмайди;
- Мамлакат пойтахтининг Нур-Султон номи аввалги – Остонага қайтарилади.
Сентябрь ойида Қозоғистон президенти Қосим-Жўмарт Тўқаев навбатдан ташқари президентлик сайловларини 2022 йилнинг кузида ўтказишни таклиф қилган эди. Шунингдек, у президентлик муддатини етти йилга узайтириш ташаббуси билан чиққан. Бундан ташқари Тўқаев Нур-Султон номини Остона деб ўзгартириш тарафдори бўлган депутатларнинг таклифини қўллаб-қувватлаган.
Қозоғистон пойтахтининг номи 2019 йил март ойида Қосим-Жўмарт Тўқаевнинг ташаббуси билан Остонадан Нур-Султонга ўзгартирилган эди.
Изоҳ (0)