Қозоғистон Коллектив хавфсизлик шартномаси ташкилотидан чиқиши ҳақидаги хабарларни рад этди

Қозоғистон Ташқи ишлар вазирлиги республика, гўёки, Коллектив хавфсизлик шартномаси ташкилоти (КХШТ) аъзолигидан чиқиши ҳақидаги ахборотни рад этди, деб ёзади «РБК».

Қозоғистон Ахборот ва жамият тараққиёти вазирлиги кўмагида яратилган «Стопфаке.кз» портали маълумотларига кўра, ижтимоий тармоқларда ва мессенжерларда Қозоғистон 2023 йил 1 январдан КХШТ таркибидан чиқишни режалаштираётгани ҳақида хабарлар тарқалган.

«Баъзи ижтимоий тармоқларда пайдо бўлган, Қозоғистоннинг, гўёки, КХШТдан чиқишни режалаштираётгани ҳақидаги ахборот мутлақо фейк ҳисобланади ва ҳақиқатга тўғри келмайди», — дейилади портал келтириб ўтган ТИВ хабарида.

Вазирлик томонидан берилган жавобда қайд этилишича, Қозоғистон ташкилот тузилиши жараёнининг бошида турган ва унинг фаол иштирокчиси ҳисобланади. «КХШТга аъзолик мамлакатимиз миллий манфаатларига тўлиқ мос келади… Қозоғистон Коллектив хавфсизлик шартномаси ташкилотидан чиқиш имкониятини кўриб чиқмаяпти деб мутлақо аниқ айтиш мумкин», — дея таъкидлади ТИВдагилар.

Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Қозоғистондаги тартибсизликлар фонида мамлакат бўйлаб фавқулодда ҳолат эълон қилинди. Мамлакат президенти Қосим-Жўмарт Тўқаев КХШТдан тинчликпарвар кучларини юборишни сўради. 6 январдан Қозоғистонга КХШТ ҳарбийларини жўнатиш бошланди.

11 январь куни Тўқаев мамлакатдаги вазият барқарорлашгани, икки кундан кейин тинчликпарвар кучларни олиб чиқиш бошланиши мумкинлигини маълум қилди. 19 май куни Россия Қозоғистондан тинчликпарвар кучларини олиб чиқишни якунлади.

Тўқаевнинг сўзларига кўра, КХШТ Қозоғистон учун оғир вазиятда кўмак кўрсатган, уларнинг келиши Олмаотани ҳужумчилардан озод этиш имконини берган. Олмаота ва тўққизта вилоят марказлари уларнинг қўлига ўтиб кетган пайт бўлди, бироқ КХШТ контингенти келиб, Қозоғистоннинг энг йирик шаҳрини ҳужумчилар қўлидан олиб қўйишга ёрдам берди, деганди мамлакат президенти.

Коллектив хавфсизлик шартномаси ташкилоти — айни пайтда Арманистон, Беларусь, Қозоғистон, Қирғизистон, Россия ва Тожикистонни ўз ичига олган Евросиё ҳукуматлараро ҳарбий иттифоқи. Ташкилотни тузиш ҳақидаги шартнома 1992 йил 15 майда имзоланган.

КХШТ мақсадлари тинчликни, халқаро ва минтақавий хавфсизлик ва барқарорликни мустаҳкамлаш, аъзо давлатлар мустақиллиги, ҳудудий яхлитлиги ва суверенитетини коллектив асосда ҳимоялашдан иборат.