Бундан икки йил аввал «Дарё» нашрида Қашқадарё вилоятида фаолият юритувчи тадбиркор, пахтачилик кластери раҳбари Нурбек Эргашев билан боғлиқ муаммолар, тадбиркорнинг фаолиятига тўсиқ қўйилгани ҳақида туркум мақолалар эълон қилинганди. Ўшанда Қарши туманининг собиқ аёл ҳокими Мақсуда Мустафоева тадбиркорнинг пахта учун давлатдан олган кредит маблағини ғаллага, ғалла комбайнлари таъмирига сарфлаши кераклигини айтгани, тадбиркор эса бунга эътироз билдиргани ёзилганди.
Тадбиркорга боғча, мактаб қуриб бермаётганини, телефон қўнғироқларига жавоб бермаслигию, селекторларда иштирок этмаслигини айтган ҳоким ундан 15 минг гектар ерини тортиб олганди.
Тақдир тақозосини қарангки, туман ҳокими «синдиришга» уринган тадбиркорни бугунги кунга келиб президент Шавкат Мирзиёев сийлади. Унинг меҳнатлари эътироф этилиб, тадбиркорга «Дўстлик» ордени топширилди.
«Дарё» давлат раҳбари эътирофига эришган тадбиркорни яна суҳбатга тортди ва айни кундаги фикрлари билан қизиқди.
Шахсан давлат раҳбарининг ўзи «нима муаммойинг бор, мендан қандай ёрдам керак», демоқда
Сўнгги йилларда Ўзбекистонда тадбиркорликни ривожлантириш учун катта қадам ташланди ва бунинг учун керакли барча ишлар қилиняпти. Соҳа ривожи учун шахсан президентимиз Шавкат Мирзиёевнинг ўзи бош-қош бўлмоқда. Бу эса биз тадбиркорларга куч, иштиёқ беряпти. Айниқса президентимизнинг тадбиркорлар билан шахсан, юзма-юз кўришиб, мулоқот қилиши бизга куч беряпти. Тасаввур қилинг, шахсан давлат раҳбарининг ўзи «нима муаммойинг бор, мендан қандай ёрдам керак», деб тургач, бизга бундан ортиқ нима керак?», — дейди тадбиркор Нурбек Эргашев.
«Президентимиз эътиборида эканимдан қувондим»
Ўша куни сафардан қайтгандим. Тошкентга боришингиз керак дейишгач, президентимиз билан мулоқотга чақирилганимдан жудаям қувондим. Ишонасизми, мукофот берилишини билганимда жудаям қувондим. Тўғриси, мен учун кутилмаган ҳолат бўлди. Бу мукофот нафақат менинг, оилам, жамоам, яқинларим ва Қашқадарё аҳлининг мукофоти бўлди», — дейди тадбиркор.
Президент билан учрашувда иштирок этишим ҳақида эшитганимдан сўнг ўзимни қийнаб келаётган барча муаммолар ҳақида гап очаман, шахсан президентимиздан бу ҳақда сўрайман деб ният қилдим ва шу ниятда Тошкентга бордим. Балки, ишонмассиз, лекин мен айтмоқчи бўлган барча муаммо залда президентимиз томонидан айтилди. Ҳатто бу муаммолар ечими ҳақида ҳам маълумот берилди. Қисқаси мен ва мен каби тадбиркорларни қийнаб келаётган муаммоларни президентимиз олдиндан билган ва биз билан учрашувда айнан шу масалаларни шахсан ўзлари гапирди. Саволга ўрин қолмади», — дейди суҳбатдош.
Тадбиркорнинг эсга олишича, Қарши туманининг собиқ ҳокими Мақсуда Мустафоева билан боғлиқ жараёнлар, яъни фаолиятига тўсиқ қўйилиши, ноҳақ айбланиб, ери тортиб олингани билан боғлиқ воқеалар уни ранжитган. Аммо давлат раҳбарининг эътирофи ўша машаққатларни ёддан чиқаришига ёрдам берган.
Тан олиш керак, Қарши туманининг собиқ ҳокими Мақсуда Мустафоева билан боғлиқ жараёнлар, судлашишлар соҳага нисбатан қизиқишим йўқолишига, эй, деб барчасига қўл силташимгача олиб борган. Лекин оиламнинг, яқинларимнинг, қўл остимда фаолият юритаётган ишчиларимнинг ишончи ва қўллаб-қувватлаши сабаб яна йўлимда давом этдим. Ва бугун хато қилмаганимни, вақтида чекилган машаққатларнинг кун келиб роҳати бўлишини тушуниб етдим. Шахсан давлат раҳбари бизнинг кичкина меҳнатимизни эътироф этиб, қўллаб-қувватлаётгани бошимдан ўтказган барча қийинчиликлар, машаққатларни эсдан чиқаришимга ёрдам беряпти», — дейди Нурбек Эргашев.
Компаниямиз 12 та йўналиш бўйича фаолият кўрсатади. Бу ерда 2 минг 800 нафар ишчи бор. Далада пахтани уруғлашдан тортиб, уни етиштириш, қайта ишлаш ва экспорт қилиш ишлари билан шуғулланамиз. Бир вақтнинг ўзида 50 минг тонна пахтани, 30 минг тонна чигит, 20 тонна толани қайта ишлаб, тайёр маҳсулот тарзида экспорт қилиш имкониятимиз бор. Бироқ, еримиз тортиб олингани боис, айни кунда хом ашё тақчиллиги бор. Шунга қарамасдан хом ашёни биржада сотиб олиб, ишимизни давом эттириб келяпмиз. Бундан ташқари 1000 та асалари уйи бор. Тоғ асалини қадоқлаб, экспорт қилиш билан шуғулланамиз. Туркия билан уруғчилик бўйича қўшма корхона ташкил этганмиз. Қолаверса, биолабораториямиз бор. Ишчиларимиз 2 миллион сўмдан 10 миллион сўмгача маош олади», — дейди тадбиркор.
Қарши туманидаги фаолиятимиз давомида туманнинг собиқ ҳокими билан боғлиқ суд жараёнлари, тадбиркорга қилинаётган муносабатдан кейин тадбиркорликни йиғиштираман деган қарор ҳам бўлган, аммо оиламнинг, яқинларимнинг, жамоамнинг қўллаб-қувватлагани, уларнинг менга ишонч билдиргани яна ишлашга ундаган. Президентимизнинг тадбиркорлар билан учрашувида бир тадбиркор давлатимиз раҳбарига «бунча кўп энергияни қаердан оласиз, бунинг сирини бизга ҳам айтинг», деганида, «бунинг ҳеч қандай сири йўқ, энг асосийси Ватанни севиш керак», дедилар-ку, мен ҳам ўша ҳис туйғу билан шу пайтга қадар ишлаб келдим. Ишимни севдим, жамоамни севдим, Қашқадарё халқини севдим ва аҳолига яхши иш ўрни яратиш, уларни қўллаб-қувватлаш иштиёқи менга куч берган. Биз ишлаб чиқараётган маҳсулотлар жаҳонда Султон бренди билан чиқса, ишчиларимизга яхши маош берсак биздан бахтли инсон йўқ», — дейди тадбиркор.
Муроджон Бердиалиевич вилоятга раҳбар бўлиб келган кунидан бошлаб, тадбиркорлар билан кўришди. Уларни тинглади. Тадбиркорларни қизиқтирган муаммоларни ўрганди. Вилоят ҳокимининг шахсан ўзи тадбиркорларни қўллаб-қувватламоқда. Ўзлари хабар олиб, қандай муаммолар бор, мендан қандай ёрдам керак деб сўраб туради. Менда ҳам муаммо бўлса, шахсан вилоят ҳокимига телефон қилиб, айтиш имкониятим бор. Хуллас, бюрократия йўқ. Қўллаб-қувватлаш зўр», — дейди тадбиркор.
Нурбек Эргашев Ўзбекистон президентининг тадбиркорларга бу қадар ғамхўрлигига тадбиркорлар ҳам муносиб жавоб қайтариши керак деган фикрда.
«Яратиб берилаётган барча имкониятлар ва шахсан президентнинг ғамхўрлигига биз тадбиркорлар ҳам муносиб жавоб беришимиз керак деб ўйлайман. Бу қадар имконият ва эътибор, қўшимчасига имтиёзга ўз вақтида яхши ишлаб, экспорт салоҳиятини ошириб, президентимиз, халқимиз олдида ўзимизни кўрсатишимиз керак», — дейди тадбиркор.
Изоҳ (0)