Россиянинг Санкт-Петербург шаҳар Смолнинский туман суди президент Владимир Путинни давлатга хиёнатда айблаб, уни лавозимидан четлатишга чақирган беш нафар муниципал депутатга жарима тайинлади, деб ёзади Meduza.
«Тармоқлар озодлиги» ҳуқуқни ҳимоя қилиш лойиҳаси хабарига кўра, депутатлар Россия Маъмурий кодексининг армияни «обрўсизлантирганлик» тўғрисидаги моддаси бўйича айбдор деб топилган.
Ташаббус муаллифи бўлган Дмитрий Палюга 47 минг рубль (783 доллар), унинг ҳамкасби Никита Юферев 46 минг рубль, Дмитрий Балтруков, Иван Чеботар ва Анна Киселёва эса 44 минг рублдан жаримага тортилган.
7 сентябрь куни Смолнинское депутатлар кенгаши Путинни лавозимидан четлатиш учун Давлат думасини унга қарши давлатга хиёнат айбловини эълон қилишга чақиришга қарор қилди — депутатлар фикрича, президент томонидан Украинада бошланган уруш туфайли, Россиянинг «меҳнатга лаёқатли ёш» фуқаролари ҳалок бўлмоқда, Россия иқтисодиёти ҳалокатга учрамоқда, НАТО шарққа қараб кенгаймоқда, Украина эса янги қурол-яроғларни қўлга киритмоқда. Кўп ўтмай, етти нафар питерлик депутатлар полицияга чақирилди, уларнинг беш нафарига нисбатан амалдаги ҳукуматни «обрўсизлантирганлик» ҳақида баённомалар тузилди.
8 сентябрь куни Москванинг Ломоносовский муниципал округи депутатлари кенгаши Россия президенти Владимир Путинга мурожаат қилиб, истеъфо беришни сўради. Депутатлар таъкидлашича, Путиннинг иккинчи муддатидан бошлаб «ҳамма нарса нотўғри йўлдан кетган».
12 сентябрь куни муниципал депутатлар Россия президенти Владимир Путиннинг истеъфосини талаб қилиб, петиция эълон қилди. 13 сентябрь ҳолатига петиция Россиянинг турли шаҳарларидаги қарийб 60 нафар муниципал депутат томонидан имзоланди.
14 сентябрь куни эса Смолнинский туман суди прокуратуранинг Смолнинское муниципал кенгашини тарқатиб юбориш имконияти ҳақидаги талабини қондирди.
Изоҳ (0)