Халқаро фуқаролик авиацияси ташкилоти (ICAO) дунёнинг 187 та давлатида парвозлар хавфсизлиги аудити саҳифасида Россияга қизил байроқча шаклидаги белгини қўйди, деб ёзади Meduza.
ICAO Россияда «парвоз учун яроқлилик» категориясида стандартларни бажариш самарадорлиги бўйича баҳосини 77,4 фоизгача пасайтирди.
Июнь ойида «РБК» ICAO ўзининг ёпиқ бюллетенида самолётнинг икки марта рўйхатга олиниши туфайли, Россияда парвозлар билан боғлиқ муаммолар борлигини қайд этгани ҳақида ёзганди. Ташкилот қоида бузлиши ҳолатини 14 сентябрга қадар бартараф этишга чақирган, акс ҳолда «хавфсизлик соҳасидаги аҳамиятли хавфлар» ҳақидаги ахборотни жамоатчиликка эълон қилишга ваъда берганди.
Ўшанда «РБК» манбаси рўйхатга олиш давлатига, хусусан, самолёт ускуналари ишлаши учун радиочастоталардан фойдаланилиши боғлиқ эканлигини айтганди. «Росавиация» ҳаво кемаларининг икки марта рўйхатга олинишини «дўст бўлмаган давлатлар» хатти-ҳаракатлари билан изоҳлаган ва ICAO’нинг Россия авиакомпаниялари самолётларининг хавфсиз эмаслиги ҳақидаги хулосаларини рад этган эди.
Энди эса, ICAO томонидан қизил байроқча берилганидан кейин, Россия парвозлар хавфсизлигини таъминлаш билан боғлиқ муаммолар расман эълон қилинган мамлакатлар қаторига кирди. Айни пайтда қизил байроқча, Россиядан ташқари, фақат Бутанда бор.
Аноним авиаэкспертлар The Insider’га маълум қилишича, ICAO хулосалари асосида бошқа мамлакатлар Россия самолётларига ўз ҳаво ҳудудидан фойдаланишни тақиқлаши мумкин, чунки ICAO меъёрлари бўйича у ёки у мамлакат ҳаво ҳудудида юз берган ҳалокат учун шу мамлакат ҳукумати жавобгар бўлади.
Россия авиакомпаниялари хорижий самолётларининг кўпчилиги Бермуда оролларида рўйхатдан ўтган. Март ойида, Россия Украинага бостириб кирганидан кейин кўп ўтмай, Бермуда ороллари ҳукумати ушбу самолётларнинг парвозга яроқлилиги ҳақидаги сертификатлар амал қилишини тўхтатиб қўйди. Авиапаркни сақлаб қолиш учун Россия ҳукумати 500 дан ортиқ самолётни Россия юрисдиксиясига ўтказди.
ICAO — БМТ таркибидаги ташкилот бўлиб, фуқаролик авиацияси бўйича халқаро меъёрларни белгилайди. Дунёнинг 193 та мамлакати ICAO’га аъзо.
Изоҳ (0)