Ижтимоий тармоқларда Хоразм вилоятида аёлнинг туғуруқдан сўнг шифокорлар айби билан вафот этгани юзасидан мурожаат тарқалганди. Вилоят прокуратураси ҳолат юзасидан муносабат билдирди.
Аниқланишича, 12 сентябрь куни Янгибозор тумани тиббиёт бирлашмаси туғуруқ комплексида туманнинг Ширинқўнғирот қишлоғи «Очанқалъа» маҳалласида яшаган, 1998 йилда Янгибозор туманида туғилган фуқаро Г.Б. қиз жинсли чақалоқ туққан ва туғуруқдан кейин Г.Б.да қон кетиш кузатилгач, унда бачадон ортиғи билан олиш жарроҳлик амалиёти ўтказилган.
Амалиётдан кейин Г.Б. 13 сентябрь куни РШТЁИМ Хоразм филиалига ўтказилган ва кўрсатилган тиббий ёрдамга қарамай, 14 сентябрь куни филиалнинг жонлантириш бўлимида вафот этган.
Фуқаро Г.Б.нинг ўлими сабабини аниқлаш юзасидан суд-тиббий экспертизаси ҳамда унга кўрсатилган тиббий ёрдамнинг тўғри ёки нотўғрилигини аниқлаш юзасидан комиссиявий суд-тиббий экспертизаси, шунингдек, унинг вафоти бўйича шифокорларнинг ҳаракатлари юзасидан хизмат текшируви тайинланган.
Ҳозирда ҳолат юзасидан Янгибозор тумани прокуратураси томонидан терговга қадар текширув олиб борилмоқда.
Изоҳ (0)