Халқ депутатлари Яккабоғ туман кенгаши котибияти бошчилигидаги ишчи гуруҳ вилоят ҳокими ўринбосари Рустам Йўлдошев ва туман ҳокими Лутфиддин Абдуллаев бошчилигида очилган ихтисослаштирилган мактаб таъмирини кўзбўямачилик деб атади. Бу ҳақда котибиятнинг Telegram’даги расмий саҳифасида маълумот берилган.
Қайд этилишича, коммунал соҳа ва аҳолига хизмат кўрсатиш масалалари бўйича доимий комиссия, туман депутатлари, тумандаги ташкилот вакилларидан иборат ишчи гуруҳ «Мевазор» МФЙда жойлашган ихтисослаштирилган мактабнинг янги ўқув йилига тайёргарлигини кўздан кечирган.
«Президентимизнинг ‘Президент таълим муассасалари агентлиги тизимидаги ихтисослаштирилган мактаблар тармоғини кенгайтириш тўғрисидаъги 2022 йил 14 апрель куни қабул қилинган фармони ижросини таъминлаш, шунингдек, ихтисослаштирилган мактаб-интернатлар ва ихтисослаштирилган мактаблар фаолиятини самарали ташкил этиш мақсадида Яккабоғ туманида яқинда ташкил этилган, тантанали очилиши бўлиб ўтган ихтисослаштирилган мактабдаги таъмирлаш ишлари билан танишдик. Танишиш жараёнида бир қатор камчиликлар аниқланди. Жумладан ихтисослаштирилган мактаб қурилиши охиригача етказилмаган. Бино уч қаватдан иборат бўлиб, учинчи қавати умуман таъмирталаб аҳволда», — дейилади котибият ахборотида.
Маълумот берилишича, ихтисослаштирилган мактаб таъмири учун давлат бюджетидан 6 миллиард 500 миллион сўм маблағ ажратилган бўлиб, бу маблағлар ҳанузгача қурувчи ташкилот ҳисоб рақамига ўтказиб берилмаган.
«Натижада ихтисослаштирилган мактаб учун ажратилган мебель жиҳозлари олиб келинмаган, ўқувчилари ва ўқитувчилари фойдаланиши лозим бўлган кутубхоналар керакли мебеллар билан жиҳозланмаган. Ошхона таъмири чала қолиб, ишга туширилмаган. Ўқувчилар яшаши учун ётоқхоналар мавжуд эмас. Стадион, спорт заллари, ўқув йили учун умуман тайёр эмас. Умуман олганда ихтисослаштирилган мактабда ҳеч қандай таъмирлаш ишлари амалга оширилмаган», — дейилади депутатлар фикри бериб борилувчи расмий каналда.
Котибият масъулларидан иборат ишчи гуруҳ таъмирталаб мактабнинг тантанали очилишини кўзбўямачилик деб номлади.
«Ўқув йили бошланиши аввалида ‘ура-ураъчилик билан ‘президент мактабиънинг бундай ҳолатда очилиши кўзбўямачиликдан бошқаси эмас. Масъул ташкилотлар бу ҳолатга нега жим қараб турибди? Президентимизнинг мамлакатимиздаги ёшлар учун шунчалик жон куйдириб чиқарган қарор ва фармонлари жойларда ижро этилмасдан қолиб кетяптими? Мактаб директори нега бу ҳолатга жим қараб турибди? Бундан ким манфаатдор? Туман ҳокиминг ёшлар сиёсати ва ижтимоий масалалар бўйича ўринбосари бу ҳолатга нима деб жавоб беради? Ишчи гуруҳ азолари бу каби саволларга жавоб кутиб, яна бироз фурсатдан сўнг ушбу мактабда ўрганиш ишларини олиб боради», — дейди ўрганувчилар.
Изоҳ (0)