Ўзбекистон Болтиқбўйи давлатларига 1 млн долларлик қуритилган мева, полиз экинлари ва ошхона анжомлари етказиб беради

Латвия пойтахти Ригада «Rigа Food-2022» озиқ-овқат маҳсулотлари ва технологиялари кўргазмаси бўлиб ўтди, деб хабар бермоқда «Дунё» ахборот агентлиги.

Қайд этилишича, жорий йилда ушбу кўргазма ишида дунёнинг 25 мамлакатидан 400 дан ортиқ компания иштирок этган. Унда 12 давлат, жумладан, Ўзбекистоннинг миллий стендлари намойиш этилган.

Ўзбекистоннинг 120 квадрат метр майдонда жойлашган «Маde in Uzbekistan» бўлмаси энг йирик миллий стендга айланган ҳолда Латвия ва Европанинг бошқа мамлакатларидан келган юқори мартабали иштирокчилар, салоҳиятли шериклар, истеъмолчилар ва бошқа мутахассислар ўртасида катта қизиқиш уйғотган.

Кўргазмада мамлакат қандолатчилик маҳсулотлари: Crafers, N’medov, Lindo Confectionery, Choco Blessed, Sladus, Finland Butter, Shirin Asal Food, табиий шарбатлар Natural Juice, Platinum Garden, «Сочная долина», Viko сингари 20 та экспортёр компания томонидан намойиш этилган.

Музокаралар натижаларига кўра, Латвия ва Болтиқбўйининг бошқа мамлакатларига қуритилган мевалар, қовун, тарвуз, ошхона анжомлари сингари 1 миллион доллар миқдорига тенг маҳсулот етказиб бериш бўйича шартномалар имзоланган.