Фарғона вилояти Қўқон шаҳрида чет давлатга ишлагани кетмоқчи бўлган аёл эри томонидан пичоқланди. Бу ҳақда «Замон» информацион дастурида хабар берилди.
Қайд этилишича, қўқонлик фуқаро А. ва данғаралик А. 2015 йилда турмуш қуриб, бир нафар фарзандли бўлишган.
Улар Қўқон шаҳридаги квартиралардан бирида вақтинча яшаб келаётган бўлган. Бир кун эр-хотин ўртасида келишмовчилик юзага келган ва аёл аразлаб, онасининг уйига чиқиб кетган. Қайнона-қайнотаси аёлнинг она уйига боришганда у уйига бормагани, балки синглисиникида яшаб келаётгани маълум бўлган.
Кейинроқ аёл турмуш ўртоғига қўнғироқ қилиб, Туркия давлатига кетаётгани, ойига 200 доллар жўнатиб туришини ва ўғлига ғамхўрлик қилиб туришини айтган. Эри эса хотинига хато қилаётганини айтиб, уни бу фикридан қайтаришга уринган. Орадан 4-5 кун ўтгач ўзларининг вақтинча ижарада турган уйида кўришишганда жанжал юзага келган.
Жанжал давомида эркак хотинини аввал танасининг турли жойларига қўли билан уриб, сўнгра ўнг кўз қовоғи ва кўкрак қафасининг чап соҳасига пичоқ билан уриб, ҳаёт учун хавфли тан жароҳатлари етказган.
Ҳолат юзасидан жиноят иши очилиб, қонуний баҳо берилиши учун судга юборилган. Жиноят ишлари бўйича Қўқон шаҳар суди томонидан судланувчига Жиноят кодексининг 104-моддаси (қасддан баданга оғир шикаст етказиш) 2-қисми «л» бандида кўрсатилган жиноятни содир этган деб топилиб, унга нисбатан 5 йил муддатга озодликдан маҳрум қилиш жазоси тайинланган. Жазо қаттиқ тартибдаги колонналарда ўталиши белгиланган.
Изоҳ (0)