Буюк Британиядаги «Дорлинг Киндерслей» халқаро нашриёти сайёҳлар учун мўлжалланган «Яхшиси бу ёққа келинг» сайёҳлик қўлланмасини чоп этди. Бу ҳақда «Дунё» ахборот агентлиги хабар қилди.
Қайд этилишича, ушбу қўлланмада Ўзбекистон сайёҳлик брендининг Буюк Британиядаги элчиси Софи Иббоцоннинг машҳур Регистон майдонида жойлашган ва ЮНЕСКОнинг Бутунжаҳон мероси рўйхатидан жой олган Самарқанднинг учта рамзий диний ва меъморий ёдгорликларидан бири — Тиллакори мадрасаси ҳақидаги мақоласи ҳам ўрин олган.
Муаллиф Тиллакори мадрасасини Ватикандаги Авлиё Пётр соборига муқобил бўлган тарихий ёдгорлик сифатида таърифлаган.
«Агар гап мутлақ ҳашамат ҳақида кетар экан, кўзни қамаштирадиган бу мадраса собордан устунликка эгадир», — деб ёзади у.
Мақолада XVII асрнинг ўрталарида ҳарбий қўмондон Ялангтўш Баҳодир томонидан бунёд этилган Тиллакори мадрасасининг тарихи ва ўзига хослиги ҳақидаги батафсил маълумотлар ўқувчиларнинг эътиборига ҳавола қилинган. Ушбу меъморий обида нега бундай номланиши, у нега саёҳатчилар эътиборини тортиши, ноёб дизайни ва бошқа барча муҳим тарихий маълумотлар ушбу мақолада ўз ифодасини топган.
Изоҳ (0)