Ўзбекистондаги бир қатор банклар хорижий фуқароларнинг ҳисобрақам ва карталар очиш жараёнига ўзгартиришлар кирита бошлади.
Ҳисобрақам очишда шартлар ўзгариши ҳақида биринчи бўлиб «Капиталбанк» эълон қилди. Хабарда айтилишича, бу чеклов мувофиқлик назоратини кучайтириш ҳамда ҳисоб-китоблар ва пул оқимларининг шаффофлигини таъминлашга қаратилган.
12 сентябрдан бошлаб Ўзбекистон норезидентлари қуйидаги шартлардан бири бажарилган тақдирдагина «Капиталбанк»да ҳисоб рақамларини очиши мумкин бўлади:
- расмий ишга жойлашган;
- маҳаллий университетларда ўқиётган;
- банкка мурожаат қилишдан олдин 15 кундан ортиқ мамлакатда бўлган.
Шу билан бирга, фуқаролар учун ҳисобварақ ва депозитлар очиш шартлари аввалгидек қолди.
Шунингдек, «Ипак йўли» банки томонидан чет эл фуқароларига хизмат кўрсатиш шартлари ўзгартирилди. Улар 12 сентябрдан бошлаб фақат банк бош офисидаги оператив бўлимда ҳисобварақ ва пластик карточкаларни очишлари мумкин бўлади.
Июль ойи охирида «Капиталбанк» ва «Ипак йўли» бошқа баъзи банклар қатори хорижий валютадаги карталардан нақд пул ечиб олиш учун комиссияларни жорий қилган. Қайд этилганидек, чора-тадбирлар вақтинчалик бўлиб, у «нақд хорижий валюта билан боғлиқ муаммоларни» ҳал қилишга қаратилган.
Аввалроқ Россияда «Visa учун — Ўзбекистон» саёҳат тури очилгани, бу ёрдамида мамлакат аҳолиси ҳисобрақам ва халқаро карталар очиш учун Ўзбекистонга ташриф буюраётгани ҳақида хабар берилганди.
Изоҳ (0)