O‘zbekistondagi bir qator banklar xorijiy fuqarolarning hisobraqam va kartalar ochish jarayoniga o‘zgartirishlar kirita boshladi.
Hisobraqam ochishda shartlar o‘zgarishi haqida birinchi bo‘lib “Kapitalbank” e’lon qildi. Xabarda aytilishicha, bu cheklov muvofiqlik nazoratini kuchaytirish hamda hisob-kitoblar va pul oqimlarining shaffofligini ta’minlashga qaratilgan.
12-sentabrdan boshlab O‘zbekiston norezidentlari quyidagi shartlardan biri bajarilgan taqdirdagina “Kapitalbank”da hisob raqamlarini ochishi mumkin bo‘ladi:
- rasmiy ishga joylashgan;
- mahalliy universitetlarda o‘qiyotgan;
- bankka murojaat qilishdan oldin 15 kundan ortiq mamlakatda bo‘lgan.
Shu bilan birga, fuqarolar uchun hisobvaraq va depozitlar ochish shartlari avvalgidek qoldi.
Shuningdek, “Ipak yo‘li” banki tomonidan chet el fuqarolariga xizmat ko‘rsatish shartlari o‘zgartirildi. Ular 12-sentabrdan boshlab faqat bank bosh ofisidagi operativ bo‘limda hisobvaraq va plastik kartochkalarni ochishlari mumkin bo‘ladi.
Iyul oyi oxirida “Kapitalbank” va “Ipak yo‘li” boshqa ba’zi banklar qatori xorijiy valyutadagi kartalardan naqd pul yechib olish uchun komissiyalarni joriy qilgan. Qayd etilganidek, chora-tadbirlar vaqtinchalik bo‘lib, u “naqd xorijiy valyuta bilan bog‘liq muammolarni” hal qilishga qaratilgan.
Avvalroq Rossiyada “Visa uchun — O‘zbekiston” sayohat turi ochilgani, bu yordamida mamlakat aholisi hisobraqam va xalqaro kartalar ochish uchun O‘zbekistonga tashrif buyurayotgani haqida xabar berilgandi.
Izoh (0)