Мамлакатда анъанавий деҳқон бозорларидан бирмунча фарқ қилувчи қишлоқ хўжалиги маҳсулотлари савдо мажмуаси очилди. Бу ҳақда Қишлоқ хўжалиги вазирлиги хабар берди.
Энди фермер ва деҳқонлар ўз маҳсулотларини вилоятлардан олиб келиб, улгуржи савдони воситачиларсиз амалга ошириши мумкин.
Бундан ташқари, маҳсулотларни вилоятлардан Тошкент ҳалқа йўлига (ТҲАЙ) кирмасдан, Янги Сергелидан олиб кириш имконияти пайдо бўлди. Ўз навбатида, бу ТҲАЙдаги транспорт оқимини камайтиришга хизмат қилади.
Савдо мажмуаси Ўзбекистондаги биринчи қишлоқ хўжалиги кластери (бир ҳудудда жойлашган ва бир-бири билан ҳамкорлик қилувчи ташкилотлар гуруҳи) сифатида ўз фаолиятини бошлайди ва 2022 йил сентябрь ойи охирида тўлиқ қувват билан ишлайди.
Янги бозор ҳудудий тадбиркорлар учун қулай ҳудудда — Тошкент шаҳридаги Қўйлиқ бозоридан 3 км узоқликда жойлашган бўлиб, 60 гектар майдонни эгаллайди ва у 24 соат ишлайди.
Янги комплекс қуйидагиларни ўз ичига олади:
- Қишлоқ хўжалиги маҳсулотлари чакана савдо бозори. Автотрассадан бозор ҳудудига асосий 2 та: юк автомобиллари учун ҳамда енгил автомобиллар учун йўл орқали кириб келинади. Ҳар бир йўл 12 тадан қатнов йўлакларидан иборат;
- Улгуржи савдо майдони, у 16 000 м2 майдонни эгаллаган;
- Енгил автомобиллар бепул тураргоҳи (сиғими – 3 500 та автомобиль);
- Юк автомобиллари бепул замонавий тураргоҳи (сиғими — 400 та юк машинаси);
- Меҳмонхона комплекси;
- Омборлар – қуруқ, музлаткичли, совиткичли;
- Бизнес марказ, банк биноси ва бошқалар.
Cross-Docking хизмати
Бозорда Cross-Docking логистика операцион тизимидан фойдаланилади. Ушбу тизим омборда сақлаш босқичини истисно қилади яъни маҳсулот кўплаб омборлар ва етказиб берувчиларни четлаб ўтган ҳолда, бевосита улгуржи савдо нуқтасида сотиб олинади.
Янги маҳсулотлар тўғридан-тўғри улгуржи сотувчилардан сотиб олинади. Мажмуада 5 та кросс-док хизмат кўрсатади, унда бир пайтнинг ўзида 400 дона юк машиналарига хизмат кўрсатиш имконияти мавжуд.
Изоҳ (0)