Банклар, биржалар, брокерлар ва бошқа компаниялар охирги йиллардагига қараганда IT-мутахассисларини жалб қилиши осонлашди. Бу ҳақда Financial Times хабар бермоқда.
Илгари молиявий компаниялар бундай мутахассисларни ишга олишда қийинчиликларга дуч келган, чунки улар технология ва криптовалюта компанияларида ишлашни афзал кўрган. Энди эса вазият ўзгармоқда.
Бунинг сабаби, кўплаб технология ва криптовалюта компанияларининг иқтисодий қийинчиликларга дуч келиб, ходимларни ишдан бўшатганидир.
Маълумотларга кўра, жорий йилда ушбу соҳада жами 75 минг ходим ишдан бўшатилган. Хусусан, Microsoft ва Facebook юзлаб пудратчиларга улар билан тузилган шартномаларни муддатидан олдин бекор қилишини эълон қилган.
Йирик компаниялар, жумладан, Apple ва Alphabet янги ходимларни ишга олишни тўхтатиб қўйди ёки сезиларли даражада секинлаштирди.
Шу билан бирга, бозор ўзгарувчанлиги шароитида Нью-Йорк фонд биржасини ва бошқа баъзи биржаларни бошқарадиган Intercontinental Exchange жорий йилда ўзининг техник жамоасини чоракдан кўпроққа оширди.
Биз технология ва криптовалюта компаниялари ва етакчи стартаплардан номзодлар оқимини кўряпмиз. Номзодлар энди меҳнат бозорига, худди сармоядорлар пасайиш давридаги қиймат ва молиявий кўрсаткичларга қараганидек, янада реалроқ қарамоқда, — деди Citadel Securities брокерлик компаниясининг тизимлаштирилган савдо бўлими раҳбари Жош Вудс.
Аввалроқ Apple 1 ҳафтада 100 га яқин ходимини ишдан бўшатгани ҳақида хабар берилганди.
Изоҳ (0)