Тожикистоннинг Душанбедан кейинги энг катта шаҳри бўлган Хўжанд Сўғд вилоятининг маркази ҳисобланади. Фарғона водийсининг ғарбий қисмида, Туркистон тоғ тизмаси билан Мўғултоғ ўртасида, Сирдарё бўйида жойлашган.
Хўжанднинг ёши тахминан 2,5 минг йилдан иборат. Халқ орасида Сирдарёнинг чап қирғоғида Искандар Зулқарнай барпо этган қалъа шаҳарнинг аждодига айланган, деган қарашлар мавжуд.
Хўжанд шаҳридаги энг диққатга сазовор жойларидан бири бу — Сўғд вилояти тарихий музейи, Камол Хўжандий уй-музейи ва мақбарасини ўз ичига олган «Қалъайи Хўжанди» маданий-тарихий мажмуасидир.
Камол Хўжандий номидаги яшил боғда шоирнинг уй-музейи жойлашган бўлиб, у ерда эски китоблар, буюк шоирнинг рамзий мақбараси сақланади. Ғазал устаси Хўжандий Хўжандда туғилиб, ўз юртидаги тартибсизлик ва нотинчлик туфайли Табризга кетади ва ўша ерда вафот этган. Ёғоч ва гранитдан қурилган мақбарада шоирнинг Эрондаги қабридан келтирилган бир ҳовуч тупроқ бор.
Шаҳарнинг марказий бозори «Панчшанбе» бўлиб, унинг майдонида кўҳна Жомий масжиди жойлашган.
Хайрулло Бозоров бошчилигидаги Фарғона вилояти делегацияси Хўжанд шаҳрида бўлиб ўтган Тожикистон мустақиллигининг 31 йиллик тантаналарида иштирок этди.
Байрам тантаналарида тожикистонлик таниқли санъаткорлар Нигина Омонқулова, Исроил Фазлиддинов билан бирга фарғоналик хонандалар Абдужалил Қўқонов, Валижон Қодиров, Муҳсинжон Мўминов, Шерали Раҳмонов, Диёра Мухторова ижросида ўзбекча ва тожикча куй-қўшиқлар янгради.
Изоҳ (0)