Самарқанддаги «Буюк ипак йўли» сайёҳлик маркази Марказий Осиёнинг янги дурдонасига айланди. Бу ерда қад ростлаган меҳмонхона биноларининг ўзига хослиги, «Боқий шаҳар»нинг шарқона жозибаси, конгресс-холлнинг ишбилармонлик тамойилларига тўлиқ мослиги, нур таратувчи чироқлар ва мусиқали фаввора касб этган гўзаллик — барча-барчаси энг кичик деталларгача пухта ўйланган бўлиб, ҳар бир элемент меъморий ва ландшафт уйғунлигидаги бетакрор ансамбл яратилишига хизмат қилган.
Мажмуа жами 1,2 мингта хонага эга бўлган саккизта халқаро мақомдаги меҳмонхоналардан ташкил топган бўлиб, улардан иккитаси беш юлдузли, иккитаси тўрт юлдузлидир. Samarkand Regency Амир Темур 5* меҳмонхонаси Марказий Осиёда биринчи бўлиб дунёнинг етакчи меҳмонхоналари ассоциацияси — The Leading Hotels of the World таркибига киради.
Шунингдек, бу ерда сайёҳларни даволаш ва реабилитация қилиш ишларини йўлга қўйиш режалаштирилган. Тўртта Wellness Park Hotels’ни ўз ичига олган тиббий кластер тиббий туризм ихлосмандлари хизматига шай қилинган. Меҳмонларга ҳар томонлама тиббий кўрикдан ўтган ҳолда тана куч-қувватини тиклашга қаратилган дастурлардан фойдаланишлари мумкин.
Марказий Осиёдаги энг йирик конгресс маркази сиёсий, жамоатчилик ва ишбилармонлик йўналишида исталган миқёсдаги анжуманларни ўтказиш имконини беради. Мазкур юқори технологияли платформада умумий сиғими 3,5 минг кишигача бўлган ўн учта конференция заллари яратилган. Яқин кунларда бу ерда Шанхай ҳамкорлик ташкилотига аъзо давлатлар раҳбарларининг олий даражадаги учрашуви ўтказилиши конгресс марказдаги кенг имкониятларнинг янада яққол тасдиғидир. Халқаро делегациялар иштирокчилари белгиланган кун тартиби доирасида самарали ишлаш билан бирга анъанавий шарқона меҳмондўстликдан баҳраманд бўладилар.
«Боқий шаҳар» — ноёб тарихий-этнографик мажмуаси «Буюк ипак йўли» сайёҳлик марказининг гўёки оташин қалбидир. «Боқий шаҳар»да шарқона меъморчиликнинг барча ўзига хос анъаналари акс этган. Шундоққина эшкак эшиш каналининг қирғоғида қад ростлаган бу маскан, миллий ўзбек маданиятининг бор ранго-ранглиги ва тароватини, маҳаллий удумлар ва халқ анъаналарини ўзида мужассамлаштирган. Бу ерда Ўзбекистоннинг турли вилоятларидан келган ҳунармандлар, амалий санъат усталари ҳамда рассомларнинг галерея ва устахоналари, миллий ошхоналар фаолият юритади.
Гарчи статистик маълумотлар зерикарли ва рақамлар жамланмасидек туюлса-да, уларда жуда қисқа фурсатда бунёд этилган бу улуғвор иншоотга оид барча кўрсаткичлар аниқ акс этади.
Масалан, марказ жами 280 гектар (240 гектар марказ майдони ва 40 гектар эшкак эшиш канали майдони) ҳудудда жойлашган.
Транспорт артерияларининг умумий узунлиги бир неча ўнлаб километрларни ташкил этади, жумладан автомобиль йўллари — 16,2 км, пиёдалар йўлакчалари ва йўлкалар — 21,6 км, велосипед йўлкалари — 10,2 км.
Ободонлаштирилган майдоннинг умумий ҳажми 176 гектардан иборат бўлиб, жами 23 минг туп дарахт ва 100 минг туп манзарали буталар ўтқазилган.
Мажмуани ёритиш ишлари ҳам ажабтовур дизайн яратилмоқда. Бинолар ва ҳудудлар учун қўлланиладиган ноёб ёритиш тизими электр энергиясини жуда оз сарфлаган ҳолда марказнинг ажойиб тароватга эга тунги қиёфасини яратиш имконини беради.
Ҳозиргача бу ерда 1467 дона қувват тежовчи LED лампалар ўрнатилган бўлиб, йил охиригача қуёш батареялари ҳам ўрнатилади ва марказнинг электр энергиясига бўлган эҳтиёжи тўлиқ қопланади.
Шу ўринда сувда сайр қилишни хуш кўрувчилар қулайлиги ҳам эътибордан четда қолмади — исталган 9 та қайиқдан бирига ўтирган киши гўзал манзарадан завқланиб сайр қилиши мумкин. Қайиқлардан учтаси VIP тоифали кемадан иборат (иккита 20 ўринли қайиқ Италиядан, битта 30 ўринли ва 6 та 4 ўринлик стандард тоифали қайиқлар эса Хитойдан келтирилган).
Эътиборингизга ҳавола этилаётган видеоролик томошасидан сўнг Самарқанддаги «Буюк ипак йўли» сайёҳлик марказининг бор гўзаллиги ва улуғворлигини тасаввур қилишингиз мумкин. Марказ тез орада меҳмонлар учун ўз эшикларини кенг очади.
Аниқки, энг қулай логистика ва ички туризмни ривожлантириш учун яратилган кенг имкониятлар, жумладан, оилавий сайр-саёҳат завқ-шавқини уйғотувчи Самарқанд ватандошларимиз ва хорижий сайёҳларнинг севимли масканларидан бирига айланади.
Маълумот шериклик ҳуқуқи асосида тайёрланди
Изоҳ (0)