Қорақалпоғистоннинг Нукус шаҳрида қиймати қарийб 9 млрд сўм бўлган технопарк ишга тушди (видео)

Қорақалпоғистоннинг Нукус шаҳрида ёшлар технопарки иш бошлади. Бу ҳақда «Дарё» мухбири Шуҳрат Саидаҳмадов хабар берди.

Маълум бўлишича, лойиҳага қарийб 9 миллиард сўм маблағ йўналтирилган. Шу маблағ эвазига марказнинг моддий техник базаси ҳам шакллантирилган.

«Марказга Инновацион ривожланиш вазирлигининг махсус жамғармалари ҳисобидан 8,9 миллиард сўм маблағ ажратилган. Марказда 10 та иш ўрни яратилган», — дейди масъуллардан бири.

Нукус ёшлар технопаркининг очилиш маросими «InnoWeek-2022» инновацион ишланмалар ҳудудий кўргазмаси давомида бўлиб ўтган.

Технопарк 3D принтерлар, пневматика ўқув стендлари, лазер кесгич, фрезер ишлов берувчи марказ, гидравлик лист букгич, электр пайвандлагич, лаборатория жиҳозлари, компьютер техникалари ва бошқа ускуналар билан жиҳозланган.

«Ғояларни нолдан бошлаб токи протатип даражасига етказгунга қадар ёшлар технопарки ёрдам беради. Кичик ишлаб чиқариш зонаси орқали протатипларни бепул ишлаб чиқариш имконияти мавжуд», — дейди технопарк раҳбари Рустам Мадраимов.

Шунингдек, технопаркда кичик ёшдагилар учун робототехника, график дизайн, ментал арифметика, инглиз тили, нутқ маданияти бўйича ўқув курслари ташкил этилган.