Иссиқ ҳаво Калифорнияда ўрмон ёнғинларининг навбатдаги тўлқинини келтириб чиқарди. Давлат ўрмон хўжалиги департаменти маълумотларига кўра, бир нечта йирик ёнғин ўчоқлари ҳалигача бартараф этилмаган. Олимларнинг ҳисоб-китобларига кўра, иқлим ўзгариши АҚШ ғарбий қисмида сўнгги ўттиз йилликда об-ҳавонинг иссиқ ва қуруқроқ бўлишига олиб келди, келажакда ёнғинлар тез-тез содир бўлади. Америкалик ўт ўчирувчилар ёнғинга қарши қандай курашаётгани ҳақида «РБК» фоторепортаж тайёрлади.
Калифорния ўрмон хўжалиги ва ёнғиндан ҳимоя қилиш департаментининг (Cal Fire) 7 сентябрь оқшомидаги маълумотларига кўра, Хемет яқинидаги ёнғин майдони 9 минг акрдан ортиқ (тахминан 3,6 минг гектар)ни ташкил этади. Ёнғин еттита бинони вайрон қилган, икки киши ҳалок бўлган.
Форест-Хиллдаги ёнғин майдони 5 минг акрдан ортган (тахминан 2 минг гектар). Ёнғинни ўчириш ернинг нотекислиги ва об-ҳаво шароити сабаб мураккаблашмоқда. Ҳудуддаги ёнғин ҳали ҳам бартараф этилмаган.
Калифорниядаги ёнғинлар аҳоли пунктларига яқинлашди, уйлар ва машиналар ёниб кетди. Штат шимоли ва жанубида одамлар эвакуацияси эълон қилинди.
USA Today хабарига кўра, шамол ёнғинни канёнга олиб кирган, у ерда икки киши ҳалок бўлган, яна бир киши жароҳатланган. «Бу одамлар ҳудудни тарк этишга ҳаракат қилган, аммо аланга ичида қолиб кетган», — деб тушунтирди ёнғин қўмондони Жош Янссен.
Cal Fire маълумотларига кўра, Хемет яқинидаги ёнғиннинг 5 фоизи бартараф қилинган. Ёнғинни ўчиришда 285 дан ортиқ киши иштирок этмоқда.
Кучли иссиқлик нафақат ҳалокатли ўрмон ёнғинларини, балки электр энергияси узилиши хавфини ҳам келтириб чиқарди. «Энди энг ёмонига — узилишлар хавфига яқинлашмоқдамиз», — деди Калифорния губернатори Гавин Нюсом.
7 сентябрь ҳолатига Cal Fire маълумотларига кўра, Калифорниядаги ёнғинларнинг умумий майдони 32 минг гектардан ортган (тахминан 13 минг гектар). Guardian газетасининг давлат расмийларига таяниб ёзишича, у ерда иссиқ ва қуруқ об-ҳаво бўлиши кутилмоқда.
Изоҳ (0)