Россия ўзининг Болтиқбўйи соҳилидаги энг янги суюлтирилган газ (LNG) терминалидан биринчи юкни Грецияга жўнатади. Хом ашё харидори ошкор этилмаган. Бу ҳақда Bloomberg хабар берди.
Германияга ёпилган «Шимолий оқим» газ қувури яқинидаги янги терминал Россиянинг Европага оқимларни қисқартириш қарори билан кучайган мисли кўрилмаган энергетика инқирози шароитида ишга тушмоқда.
Қувурлар орқали газ етказиб бериш деярли тўхтаган бўлса-да, Россиянинг бошқа LNG заводидан ўта совитилган ёқилғи ҳали ҳам Европа портларига юборилмоқда.
Россиянинг газ гиганти «Газпром» душанба куни кичик объектда 72 соатлик синовни якунлади. Завод аллақачон 30 минг тоннага яқин LNG ишлаб чиқарган.
Украинадаги уруш бошланганидан кейин Буюк Британия мамлакатдан ўта совутилган ёқилғини олишни тўхтатган бўлса-да, ҳозирда Европада Россиянинг суюлтирилган газига нисбатан ҳеч қандай санкциялар мавжуд эмас.
Грециянинг ягона LNG иншооти йилига 6 миллиард кубометр газ ишлаб чиқариши мумкин, унинг ярми шимолга Болгария ва Шимолий Македонияга, қолгани эса ички бозорга йўналтирилади.
Болгария жорий йил бошида Россиянинг янги тўлов шартларини бажаришдан бош тортгани учун мамлакат газ қувуридан узилган эди.
Bloomberg томонидан тузилган кема кузатуви маълумотларига кўра, Псков LNG танкери ҳозирда Портовая LNG заводида ўрнатилган бўлиб, бортга биринчи юкни олиб кетмоқда.
Аввалроқ Россия давлат газ ишлаб чиқарувчиси «Газпром» компанияси 2 сентябрь куни «Шимолий оқим» қувури орқали етказиб беришни номаълум муддатга тўхтатиб қўйишини маълум қилганди.
Изоҳ (0)