Италия ҳуқуқ-тартибот идоралари мафияга аъзоликда гумон қилинган 35 кишини ҳибсга олди, деб ёзмоқда Deutsche Welle.
Нашрнинг ёзишича, мазкур гумонланувчилар 1993 йилдан бери полициядан қочиб юрган Сицилиянинг Cosa Nostra мафияси бошлиғи Маттео Мессина Денарони тутиш операцияси давомида қўлга олинди. Ўтган ҳафтада полиция мафия аъзолари деб гумон қилинганларга қарши бир қатор рейдлар ўтказди. Рейдларда Сицилиянинг узоқ ғарбидаги Трапани провинциясида мафия аъзолари деб гумон қилинганлар нишонга олинди.
Ҳибсга олинганлар жиноий тил бириктириш, товламачилик ва қимор ўйинлари ҳамда бошқа жиноятларда гумон қилинмоқда. Операция давомида тинтув ва гумонланувчиларнинг мол-мулкини мусодара қилиш ишлари амалга оширилган, операцияда жами 70 киши иштирок этган.
Мессина Денаро 1992 йилда турли ҳодисаларда ҳалок бўлган антимафия прокурорлари Жованни Фалькон ва Паоло Борселлинонинг ўлдирилишига алоқадорлиги учун сиртдан умрбод қамоқ жазосига ҳукм қилинган эди. У 1993 йилда Флоренция, Рим ва Миланда 10 кишининг ўлимига сабаб бўлган портлашлар учун ҳам қидирувга берилган.
Изоҳ (0)