Самарқанд 15—16 сентябрь кунлари Шанхай ҳамкорлик ташкилотига аъзо мамлакатлар давлат раҳбарлари кенгаши мажлисига мезбонлик қилади. Президент матбуот хизмати саммитда иштирок этувчилар рўйхатини эълон қилди.
Саммитда ташкилотга аъзо саккиз нафар давлатлар раҳбарлари иштирок этади: Ўзбекистон президенти Шавкат Мирзиёев, Россия президенти Владимир Путин, Хитой раиси Си Цзиньпин, Ҳиндистон бош вазири Нарендра Моди, Покистон бош вазири Шаҳбоз Шариф, Қозоғистон президенти Қосим-Жўмарт Тўқаев, Қирғизистон президенти Садир Жапаров, Тожикистон президенти Эмомали Раҳмон.
Беларусь президенти Александр Лукашенко, Эрон президенти Иброҳим Раисий, Мўғулистон президенти Ухнагийн Хурелсух кузатувчи сифатида ташриф буюради.
Ташкилот бош котиби Чжан Мина Беларусь ШҲТга аъзо бўлиш учун ариза топширганини маълум қилганди. Республикани ШҲТ аъзолигига киритиш тартибини бошлаш тўғрисидаги қарор Самарқандда бўлиб ўтадиган саммитда қабул қилинади. Саммитда Эрон янги доимий аъзо сифатида таништирилиши кутилмоқда.
Туркия президенти Ражаб Тоййиб Эрдўғон, Озарбайжон президенти Илҳом Алиев, Туркманистон президенти Сердар Бердимуҳамедов ва Арманистон бош вазири Николь Пашинян саммитга меҳмон сифатида таклиф этилган.
Ушбу тадбир ШҲТ етакчиларининг 2019 йилдан буён биринчи юзма-юз учрашуви бўлади ва Ўзбекистоннинг ташкилотдаги раислигига якун ясайди.
Ўзбекистон раислиги даврида асосий эътибор ташкилот доирасидаги ҳамкорликнинг савдо-иқтисодий алоқаларни мустаҳкамлаш, саноат кооперациясини илгари суриш, транспорт-коммуникация ўзаро боғлиқлигини кенгайтириш, рақамли трансформация ва «яшил» иқтисодиёт, ШҲТнинг халқаро нуфузини мустаҳкамлаш каби энг муҳим устувор йўналишларига қаратилди.
Изоҳ (0)