Тошкентнинг Чилонзор туманида 58 туп ҳар хил турдаги манзарали дарахтлар ноқонуний кесиб ташлангани аниқланди. Бу ҳақда Давлат экология қўмитаси матбуот хизмати хабар берди.
Қайд этилишича, Чилонзор тумани Чилонзор кўчасида дарахтларни ноқонуний кесилиши бўйича 7 сентябрь куни ижтимоий тармоқларда тарқалган хабар юзасидан Давлат экология қўмитаси раиси ўринбосари бошчилигида тезкор ишчи гуруҳи тузилиб, жойига чиқиб атрофлича ўрганиш ишлари олиб борилган.
Ўрганиш натижасига кўра ушбу ҳудуд Dream House Stroy масъулияти чекланган жамиятига тегишли эканлиги маълум бўлди. Қурилиш учун ажратилган мазкур ҳудуд жами 0,20 гектар ер майдонидан иборат бўлиб, 2022 йилнинг 20 январида давлат экология инспекторлари томонидан ҳудуддаги дарахтлар тўлиқ хатловдан ўтказилиб, ҳудудда жами 58 туп ҳар хил турдаги манзарали дарахтлар борлиги юзасидан далолатнома расмийлаштирилган.
Мазкур ҳужжат билан Dream House Stroy ташкилотига дарахтларни кесмаслик ва дарахтларни сақлаб қолиш юзасидан қонунчиликка белгиланган тартибда огоҳлантириш берилган. Шунингдек корхона вакиллари томонидан дарахтларга нисбатан ноқонуний ҳаракатларни амалга оширмаслик юзасидан 20 январда кафолат хати тақдим этилган.
2022 йилнинг 17 февралида ушбу жамият ягона дарча хизмати маркази орқали ҳудуддаги дарахтларни кесиш юзасидан ариза билан мурожаат этган. Тошкент шаҳар Экология бошқарма томонидан ариза атрофлича ўрганилиб, дарахтларниг кесилишига рад жавоби берилган.
Махсус ишчи гуруҳ томонидан 7 сентябрь куни тунда олиб борилган ўрганиш ишлари жараёнида Dream House Stroy’га тегишли ер майдонидаги жами 58 туп ҳар хил турдаги манзарали ва мевали дарахтлар илдиз қисмлари билан биргаликда йўқ қилингани аниқланган.
Дарахтларни муҳофаза қилиш ва сақлашга доир қонунчиликда белгиланган чораларни кўрмаганлиги натижасида ўсимлик дунёсига жами 797 миллион 700 минг сўм миқдорида зарар етказилган.
«Ўсимлик дунёсини муҳофаза қилиш ва ундан фойдаланиш тўғрисида»ги қонуннинг 37-моддаси талаблари бузилиб, Давлат экология инспекторларининг қонуний талабларини бажармагани учун Маъмурий жавобгарлик тўғрисидаги кодекснинг 197-6-моддаси, Жиноий жавобгарлик тўғрисидаги кодекснинг 198-моддасига асосан жавобгарликка тортиш масаласини кўриб чиқиш учун тегишли ҳужжатлар расмийлаштирилиб, ҳуқуқни муҳофаза қилувчи органларга юборилган.
Изоҳ (0)