Жорий йилнинг август ойи якунлари бўйича келгуси 12 ой учун нархлар ўсиши бўйича бизнес вакилларининг инфляцион кутилмалари ўтган ойга нисбатан 1,1 фоиз бандга камайиб, 14,1 фоизни ташкил этди (пдф).
Инфляцион кутилмалар — турли гуруҳлар бўйича мос жавобни белгилаган аҳоли сонининг ўша жавоблар ўртача қийматига кўпайтмалари йиғиндисини жами аҳоли сонига нисбати (ўртача кўрсаткич).
Келгуси 12 ойда инфляция кўрсатгичи жорий даражада ёки ундан юқорироқ бўлишини кутаётган тадбиркорларнинг улуши 52 фоиздан 47 фоизгача қисқарди.
Август ойида бизнес соҳаси вакилларининг кўпчилиги келгуси 12 ойда инфляцияни 9-12 фоиз атрофида бўлишини кутмоқда.
Шунингдек, сўнгги ойларда бир йилдан сўнг инфляция таргет доирасида бўлишини кутаётган бизнес вакилларининг улуши ортиб бормоқда.
Тадбиркорлар томонидан кейинги 12 ойда нархлар ошишига энг кўп қуйидаги омиллар таъсир этиши мумкинлиги таъкидланган:
- валюта курсининг ўзгариши — 33 фоиз;
- ёнилғи маҳсулотлари ва транспорт хизматларининг нархлари қимматлашиши — 29 фоиз;
- иш ҳақи ва нафақаларнинг ошиши — 24 фоиз.
Шунингдек, импорт қилинадиган хориждан хом ашё етказиб беришда узилишлар бўлишини ҳамда импорт қилишдаги тариф ва нотариф чекловларнинг мавжудлигини кутаётган тадбиркорларнинг улуши ўтган ойга нисбатан қисқарган.
Бунда бизнес вакилларининг юқоридаги омиллар бўйича хавотирларининг камайишига янги таъминот занжирлари йўлга қўяётганлиги ҳамда иқтисодиётда рақобат муҳити яхшиланиб бораётганлиги билан изоҳланмоқда.
Изоҳ (0)