АҚШ 7 сентябрь куни сўнгги бир ой ичида иккинчи марта Minuteman III қитъалараро баллистик ракетаси синовини ўтказади, бу ҳақда Пентагон матбуот котиби Патрик Райдер маълум қилди, деб ёзади «РБК».
АҚШ Ҳарбий-ҳаво кучлари глобал зарбдор қўмондонлиги 7 сентябрь куни эрта тонгда Космик кучларнинг Калифорния штатидаги Ванденберг базасидан жанговар снаряд ўрнатилмаган Minuteman III қитъалараро баллистик ракетасининг синов парвозини амалга оширади», — деди у.
Minuteman III — қаттиқ ёнилғили қитъалараро баллистик ракета бўлиб, 1970 йилдан буён АҚШ армияси арсеналидан ўрин олган. Ер устидаги нишонларни йўқ қилиш учун мўлжалланган ва зирҳли кабеллар тизими орқали ерости бошқарув маркази билан уланган махсус кондан учирилади.
У синовни одатий ва олдиндан режалаштирилган деб атади, шунингдек, Вашингтон, халқаро мажбуриятларига мувофиқ, бўлғуси парвоз ҳақида Россия ҳукуматини ҳам огоҳлантирганини маълум қилди.
Синов АҚШ ядро кучлари шайлигини, ядровий тийиб туришнинг самаралилиги ва хавфсизлигини текшириш мақсадида ўтказилмоқда.
Minuteman III нинг бундан аввалги синов парвози 16 август куни Калифорниядаги шу базада амалга оширилган эди. Ракетанинг каллак қисми 6,7 минг км масофани босиб ўтиб, Тинч океанидаги Marshall оролларида жойлашган Кважалейн атоллигача бориб етганди.
Августдаги парвоз ой бошида ўтказилиши керак эди, аммо АҚШ Вакиллар палатаси спикери Нэнси Пелосининг Тайванга сафари фонида Хитой билан кескинлик кучайгани туфайли, у бир неча марта ортга сурилганди.
Изоҳ (0)