Шанхай Ҳамкорлик Ташкилотининг Самарқанд саммити арафасида Ҳиндистоннинг The Print интернет нашри Ўзбекистон элчиси Дилшод Аҳатов билан интервью эълон қилди. Дунё ахборот агентлиги суҳбатни ўзбек тилига таржима қилди.
Интервьюда элчи Дилшод Аҳатов саммитда Эрон ШҲТнинг янги доимий аъзоси сифатида таништирилишини тасдиқлаган. Ҳозирги кунда ШҲТ таркибига саккиз давлат – Хитой, Қозоғистон, Қирғизистон, Россия, Тожикистон, Ўзбекистон, Ҳиндистон ва Покистон киради.
«Саммит кун тартибидаги асосий масалалардан бири ШҲТни янада кенгайтириш ҳисобланади. Эрон Ислом Республикасининг ШҲТга аъзо давлат мақомини олиш мажбуриятлари тўғрисидаги меморандум имзоланишга аллақачон тайёр. Бу ҳужжат Яқин Шарқнинг ушбу йирик мамлакатининг ташкилотимизга тўлиқ аъзо бўлишига асос бўлади», — дейди Дилшод Аҳатов журналистларга.
Унинг қўшимча қилишича, ШҲТ фаолиятида тўлақонли аъзо, кузатувчи ва мулоқот бўйича шерик мақомида иштирок этиш учун яна 10 га яқин мамлакатдан аризалар ҳам кўриб чиқилади.
«Ўзбекистон раислигида ўтадиган саммит алоҳида аҳамиятга эга бўлиб, барча мамлакатларга минтақавий ва глобал кун тартибидаги қатор долзарб масалаларни муҳокама қилиш учун ўз вақтида ва самарали платформани тақдим этади ва шу билан унинг ривожланишида янги босқич очади», — деган дипломат.
Изоҳ (0)