Хитой ғарбидаги Сичуан провинциясида юз берган 6,8 магнитудали зилзила қурбонлари сони 46 кишига етди.
Хитой сейсмологик тармоқлар маркази маълумотларига кўра, ер силкинишлари Гардзе-Тибет автоном округи ғарбида қайд этилган. Зилзила ўчоғи 16 километр чуқурликда, унинг эпицентри Лудин уездидан 39 километр узоқликда жойлашган.
Маҳаллий ОАВ маълумотларига кўра, бу ҳудудга Лудин ва яқин атрофдаги аҳоли пунктларидан 530 нафар қутқарувчилар юборилган.
Қурбонлар ва вайроналар ҳақида хабарлар бирин-кетин пайдо бўла бошлади. Жумладан, Ганзи шаҳрида 29 киши, Яан шаҳрида 17 киши ҳалок бўлган, 16 нафар фуқаро бедарак йўқолган.
Хитой раҳбари Си Цзиньпин табиий офатдан жабр кўрганларни қутқариш учун барча имкониятларни ишга солишга чақирди. Инсонларнинг ҳаётини сақлаб қолиш ва қурбонлар сонини камайтириш устувор вазифа эканини таъкидлаган Сзинпин силкинишларга тайёр туриш ва ўта эҳтиёткор бўлиш зарурлигини айтди.
Фалокат ҳудудига Лудиндан 30 нафар ва яқин атрофдаги аҳоли пунктларидан яна 530 нафар қутқарувчи жўнатилди.
Ганзи-Тибет автоном округи қутқарув ишларини олиб бориш учун минтақага 635 нафар полиция, ўт ўчириш, соғлиқни сақлаш, алоқа, электр ва транспорт ходимларини жўнатди.
39 минг киши зилзила марказидан 20 километр радиусда, 330 минг киши — 50 километр, 1,55 миллион киши 100 километр масофада истиқомат қилади.
Сичуан провинцияси Хитойнинг зилзила эҳтимоли энг юқори бўлган минтақаларидан бири сифатида танилган. 2008 йил май ойида бу ерда сўнгги ўн йилликлардаги энг катта — 8 магнитудали зилзила содир бўлганди. Оқибатда 87 150 киши ҳалок бўлган ёки бедарак йўқолган, 374 000 киши жароҳат олган, бир неча миллион киши бошпанасиз қолган.
Изоҳ (0)