Чеченистон раҳбари Рамзан Қодиров Россия халқи ва президентидан сўрамасдан, ўз лавозимини «шунчаки» тарк этишга ҳаққи йўқлигини айтди. У муддатсиз таътил тўғрисидаги баҳсларни тўхтатишга чақирди ва губернаторлик лавозимида энг узоқ қолиш бўйича рекордни янгиламоқчилигини айтди. Аввалроқ Қодиров унинг «вақти келгани» ҳақида гапирганди.
«Аслида мени шунчаки кетишга ҳаққим йўқ, албатта. Халқ менга ҳудуд раҳбариятини ишониб топширган. Бу ишончни оқлаш эса менинг муқаддас бурчимдир. Мен фақат Россия халқи ва президентидан сўраган ҳолда кетишим мумкин. Шунинг учун муддатсиз таътил ҳақидаги гапларни кейинга қолдирамиз», — деди Чеченистон раҳбари ўзининг видеомурожаатида.
У Чеченистон ҳудудини 15 йилдан бери бошқариб келаётганини, бироқ Россия губернаторлари ўртасидаги рекорд 27 йил эканлигини эслади. Лавозимида энг узоқ қолган раҳбар Белгород вилоятининг собиқ губернатори Евгений Савченко бўлиб, у ушбу лавозимда 1993 йилдан 2020 йилгача ишлаган.
«Мен ҳали узоқ қолганим йўқ, олдинги рекорд 27 йил бўлган. Энди мен жорий рекордни янгилашга қарор қилдим. Кўрамиз, бу кўрсаткичдан ўзиб кета олармиканман», — деди Рамзан Қодиров.
3 сентябрь куни Қодиров Чеченистон раҳбари лавозимида жуда узоқ вақт қолиб кетгани ва «муддатсиз таътилга чиқиши кераклиги» ҳақида гапирганди.
«Мана, 15 йилдан бери мен республикага раҳбарлик қиламан. Биз, кавказликлар, чеченларда, меҳмон қанчалик ҳурматли, узоқ кутилган бўлмасин, агар у ўз вақтида кетса, ёқимли бўлади, деган мақол бор. Шунинг учун, менимча, вақтим ҳам келди», — деган у.
Қодиров 2017 йил ноябрь ва 2016 йил февраль ойларида ҳам кетиши мумкинлиги ҳақида гапирган.
Изоҳ (0)