Мелбурнда рассом рус ва украин аскарлари қучоқлашиб турган граффитисини ижтимоий тармоқлардаги кескин танқидлардан сўнг бўяб ташлашга мажбур бўлди. Бу ҳақда «News.com.ау‘ хабар бермоқда.
Рассом Питер Ситон граффитини Россия ва Украина ўртасидаги муносабатларни тинч йўл билан тартибга солиш ва урушни тугатишга чақириқ сифатида чизганди. Бироқ кўпчилик буни можародаги икки томонни тенглаштиришга уриниш сифатида баҳолади.
Украинанинг Австралиядаги элчиси Василий Мирошниченко граффитини «украиналикларнинг барчаси учун ўта ҳақорат» деб атади ҳамда Ситонда «Россия босқини ҳақида ҳеч қандай тасаввур йўқ»лигини таъкидлади.
«Сурат қурбон ва тажовузкор ўртасида ёлғон тенглик ҳиссини яратади», — деди Мирошниченко.
Арт фор Украина жамоат ташкилотининг таъкидлашича, графитти оммага намойиш этилишидан олдин улар Ситонга сурат салбий қабул қилиниши мумкинлигини билдирган, аммо рассом барибир граффитини чизишга қарор қилган.
Ситон устидан ижтимоий тармоқ фойдаланувчиларининг танқидлари ҳам ёғилди. Натижада граффити чизилганидан икки кун ўтиб, рассом уни бўяб ташлади. «Одамлар бу асарни ҳақоратли деб билмоқда — балки ростан шундайдир», — дея ўз ҳаракатларини изоҳлади Ситон.
Мавзуга доир: Жамоатчиликнинг кескин чиқишлари фонида Inkuzart’нинг Зеленский ва Путин акс этган сурати ўчирилди
Изоҳ (0)