Россиянинг «Газпром» компанияси Европага олиб борадиган асосий газ қувури режалаштирилганидек қайта очилмаслигини маълум қилди. Бу эса минтақани электр токининг узилиши ва жиддий таназзулга яқинлаштирди, деб ёзмоқда Bloomberg.
Қувур шанба куни техник хизмат кўрсатишдан сўнг қайта очилиши керак эди. Бироқ сўнгги дақиқада компания техник носозлик аниқланганини ва у тузатилмагунча қувур қайта очилмаслигини маъум қилди.
Бу қиш олдидан Россия газига қарамликни тўхтатишга интилаётган ва Москванинг энергия урушидаги кейинги қадамларини кутаётган Европа учун катта зарба. Қитъа қишдан ўтиш учун чора-тадбирларни амалга оширишга ҳаракат қилар экан, қувурнинг муддатсиз ёпилиши янада кўпроқ иқтисодий тартибсизликларга таҳдид соладиган кескинликдир, — дейилади Bloomberg хабарида.
Нархлар бир йил олдингига нисбатан тўрт баравар юқори бўлган газ инқирози аллақачон Европа саноатини тўхтатишга мажбур қилмоқда ва евро курсини пасайтирмоқда.
«Газпром» газ турбинасида газ сизиб чиқиши аниқланганини айтди, бу уни ҳавога исроф бўлишига олиб келади ва уни тузатиш қанча давом этиши ҳақида ҳеч қандай маълумот йўқ.
Кеча, 2 сентябрь куни G7 мамлакатлари Россия нефтининг глобал харидлари бўйича нарх чегарасини қўйишга қарор қилган эди.
«Газпром»нинг айтишича, турбиналарни ишлаб чиқарувчи Siemens газ сизиб чиққанини тасдиқлаган ва таъмирлаш ишларини олиб бориши керак.
Аммо Siemens Energy компаниясининг таъкидлашича, «Газпром» томонидан айтилган газ сизиб чиқиши етказиб беришни тўхтатиш учун сабаб эмас. Кремль ҳеч қандай изоҳ бермаган.
Европадаги энергетика инқирозининг кескин кучайиши нархлар пасайган пайтда содир бўлди. Агар етказиб бериш тўхтатилганича қолса, уй хўжаликлари ва корхоналарни хавф остига қўяди.
Бу эса Россияга қарши урушда Украинани қўллаб-қувватлаётган Европа иқтисодиётини заифлаштиради.
Москва аллақачон бир неча ойдан бери газ етказиб беришни кескин қисқартирган. Кремль ходимларининг таъкидлашича, Москва таъминотнинг қисқартирилишидан Европа етакчиларини Киевни қўллаб-қувватлашларини қайта кўриб чиқишга мажбурлаш мақсадида сиёсий исённи кучайтириш учун фойдаланмоқда, — дейди Bloomberg.
Европа Иттифоқи энергия бозорида нархларни чеклаш, электр энергиясига бўлган талабни камайтириш масалаларини ва фойдадан олинадиган солиқларни қайта кўриб чиқмоқда. Ушбу ҳаракатлар бу ҳафта нархларни пасайтиришга ёрдам берди.
Изоҳ (0)