Хитойда 21 миллион аҳоли истиқомат қиладиган Ченду шаҳри тўлиқ карантинга ёпилди. Бу ҳақда Bloomberg хабар бермоқда.
Шу тариқа расмийлар мамлакатнинг коронавирусдан энг кам зарар кўрган ғарбий минтақасида COVID-19 ёйилишининг олдини олмоқчи. Қайд этилишича, Сичуан провинцияси пойтахти Ченду 2022 йилда карантинга ёпилган иккинчи энг йирик шаҳар бўлди — аввал Шанхайда икки ойлик карантин жорий қилинганди.
«Миллионлаб одамлар ҳаёти ва бизнесларнинг боришини ўзгартирадиган ушбу қадам ХХР иқтисодиёти ва ундан ташқарида ҳам ўз таъсирини ўтказса-да, мамлакат раҳбари Си Цзиньпиннинг Cоvid Zerо ёндашувига содиқлигини намойиш этади. Ушбу ёндашув касаллик тарқалишини олдини олиш учун оммавий тестлар ўтказиш ва блокировкаларга асосланади», — дейилади хабарда.
Чендуда карантин 1 сентябрь куни 157 кишида коронавирус қайд этилганидан кейин жорий этилди. Хитой ялпи ички маҳсулотининг қарийб 1,7 фоизини ташкил этувчи шаҳарда кўплаб технология компаниялари ва автомобиль ишлаб чиқарувчилар, жумладан, iPhone ва бошқа Apple қурилмалари ишлаб чиқарувчи дунёдаги энг йирик Foxconn Technology Group компанияси жойлашган. Шаҳар, шунингдек, панда қўриқхонаси билан машҳур сайёҳлик маскани ҳисобланади.
Бутун шаҳар тўрт кунлик оммавий тестдан ўтказилади. Ченду шаҳар расмийларининг таъкидлашича, одамлар номаълум муддатга уйда қолиши ва фақат зарурат бўлганда ташқарига чиқиши зарур. Оқибатда бозор ва дўконларда одамлар том маънода озиқ-овқат учун курашаётгани, кечалари эса деразадан бақиришаётгани акс этган видеолар тарқалди.
Хитой расмийлари видеодаги ҳайқириқлар шунчаки қўшиқли флешмоб эканини даъво қилмоқда.
Изоҳ (0)